Dzyudo. Olimpiada chempionini 40 soniyada mag‘lub etgan Keldiyorova Tbilisi “Katta dubulg‘a” turniri g‘olibiga aylandi!

Gruziyaning Tbilisi shahrida o‘tayotgan dzyudo bo‘yicha “Katta dubulg‘a” turnirining ilk kuni O‘zbekiston terma jamoasi uchun muvaffaqiyatli o‘tdi. -52 kg vazn toifasida barcha raqiblarini mag‘lubiyatga uchratgan hamyurtimiz Diyora Keldiyorova musobaqa g‘olibiga aylandi.

Barcha bellashuvlarni muddatidan avval yakunlab kelayotgan samarqandlik dzyudochimiz finalda ham chempionlik uchun ko‘p vaqt sarflamadi. Tokio-2020 Olimpiadasi chempioni kosovolik Distriya Krasnichi atigi 40 soniya ichida taslim etildi.

Bu Keldiyorova uchun “Katta dubulg‘a” turnirlaridagi to‘rtinchi oltin medal hisoblanadi. Ushbu g‘alaba orqali u jahon reytingi uchun 1000, Parij-2024 yo‘lida 500 ochkoni o‘z hisobiga qo‘shib qo‘ymoqda.

Manba: MOQ