Эдди Хирн "Zuffa Boxing" ни кескин танқид қилди

Таниқли бокс промоутери Эдди Хирн Шакур Стивенсоннинг Zuffa Boxing билан шартномаси бекор қилинганига муносабат билдирди. 

"Ишониш қийин. Ростини айтсам, аввал буни пиар юриши деб ўйлагандим. Шакурнинг жамоаси кечаси менга қўнғироқ қилиб, хабар ёзмагунча бу воқеага ишонмадим. Чунки бу Zuffa учун шунчалик шармандали ва уятли эдики, рост бўлиши мумкин эмасди.

Хабар чиққанидан кейин 30 сония ичида менга 50 та хабар келди. Ҳамма: “Кўрдингми? Zuffa тугади. Компания парчаланяпти. Дана Уайтнинг боши қотган”, деб ёза бошлади. Мен эса: “Йўқ, бу бўлиши мумкин эмас”, дедим.

Қандай қилиб тарихингдаги энг катта имзолардан бири бўлган боксчини шартнома асосида олиб, унга битта ҳам жанг бермасдан қўйиб юборасан? Менимча, бокс тарихида бундай ҳолат ҳеч қачон бўлмаган.

Дана Уайт йил охиригача Zuffa қандай тарих яратишини кўрасизлар, деган эди. Бир нарсани тан олиш керак — улар ҳақиқатан ҳам тарих ёзишди. Боксчи билан шартнома имзолашди, аммо унга битта ҳам жанг ташкил қилиб беришмади.

Албатта, биз бу вазиятдан завқланамиз. Чунки улар ҳам худди шундай қилган бўларди. Мен: “Сизлар тугадингиз, Zuffa шарманда бўлди, сизларга на жангчилар, на мухлислар ишонади”, демоқчи эмасман. Лекин бу воқеага қараб кулиб қўймасликнинг иложи йўқ.

Катастрофа. Шармандалик. Таслим бўлиш ва менинг эски рақибларимдан бири айтганидек, яна 10 ойдан кейин ҳаммаси тугайди", — деди Хирн.