Егор Кримец: «Фақат чет эл чемпионатига кетиш эмас, балки тайёр ҳолда кетиб, юртимизни муносиб намоён этиш муҳим»

SPORTS.uz эксклюзив интервьюси

SPORTS.uz сайти эксклюзив интервьюларни давом эттиради. Галдаги суҳбатдошимиз – «ProSport Management» компаниясининг Ўзбекистондаги расмий вакили, собиқ футболчи - Егор Кримец.

– Аввало, бу ишни қандай бошлаганингиз ҳақида айтиб берсангиз.

– Жорий йил март ойида Герман Ткаченко таклиф билан чиқди. Шу вақтга келиб мен футболчилик фаолиятимни якунлаган эдим. Кўп ўйламай, қарор қабул қилдим. Ордан кўп ўтмай, Москвада «ProSport Management» раҳбари ва компаниянинг Ўзбекистондаги офисини олдин бошқарган Каҳҳор Муминов билан учрашдик. Келажак режалари ва иш услубларини муҳокама қилдик. Ҳозирда компаниянинг Ўзбекистондаги расмий вакили сифатида иш бошладим.

– Сизнинг ишингиз нимадан иборат?

– Аввало, футболчиларимизга энг юқори даражада профессионал хизмат кўрсатиш. Бу жуда кўп соҳани ўз ичига олади: шартнома тузиш, ҳар бир ўйинни таҳлил қилиш, маиший масалаларда ёрдам бериш, уларга профессионал муҳит яратиш. Деярли мижозларимиз билан «бирга яшаймиз» деса бўлади. Шу билан бирга янги истеъдодларни излаяпмиз. Мамлакатимизда иқтидорли йигитлар кўп, аммо янги босқичга чиқиш учун улар катта меҳнат қилишлари керак.

– Илк трансфер ойнасида фаол иштирок этдингиз. Таассуротлар қандай?

– Ростини айтсам, миллий жамоада дебют қилгандек ҳаяжонландим. Деярли 10 та трансферда фаол иштирок этдим. Бу мен учун янги тажриба ва ўсиш имконияти бўлди. Қолимдан келганича футболчиларимиз ва компаниямизга фойдали бўлишга ҳаракат қилдим. Биз ҳар доим футболчиларга вариант таклиф этамиз. Охирги қарор эса уларники. Биз фақат ёрдам берамиз – бу иш услубимиз.

– Асосий футболчиларингиз Элдор Шомуродов ва Аббосбек Файзуллаев ҳақида нима дея оласиз?

– Ҳозир футболчиларнинг барча фикри жаҳон чемпионатига тайёргарлик ва яхши иштирок этишда. Элдорга кўп клублар қизиқди, лекин энг жиддий қизиқишни Туркиянинг «Башакшехир» клуби (City Football Group таркибида) билдирди. Улар шу вақтда Аббосга ҳам эътибор қаратди ва ижобий ҳисоботдан сўнг унга ҳам таклиф киритишди. Иккаласи бир клубга ўтгани мослашишни енгиллаштиради. Лекин янги чемпионат ва мамлакатга кўникиш учун вақт керак. Биз уларга ишонамиз – албатта уддалашади.

– Қайси трансфер энг кўп вақтингизни олди?

– Аслида, содир бўлмаган, лекин муҳим бўлган трансферлар ҳақида айтмоқчиман. Масалан, Далер Тўхсанов ва Рустам Фоминга бир нечта клублар, жумладан ЦСКА қизиқди. Биз уларга хорижий клубга ўтишдан аввал маҳаллий чемпионатда юқори даражада ўйнаш керак, деб ҳисобладик. Охир-оқибат улар ҳозирча ўз клубида қолиб, миллий жамоада ўзини кўрсатиши лозим деган қарорга келдик.

- Хориждан қизиқиш катта. Масалан, KAA Gent Азиз Тўлқинбековга қизиқди, «Ал-Иттиҳод» ёш иқтидорли футболчилардан иккинчи жамоа тузмоқчи. Австриянинг «ЛАСК» клуби 2004/2005 йилги кўплаб футболчиларни таҳлил қилди. Брентфорд таркибига кирувчи холдинг эса Азиз Холмурадовга қизиқди, лекин Испаниянинг учинчи дивизионидан бошлашни таклиф қилди. Биз бу вариантни футболчилар даражаси учун тўғри топмадик.

- Чет элга чиқиш учун тайёргарлик зарур – камида инглиз тилини билиш, профессионал бўлиш ва юқори талаб ҳамда масъулиятга тайёр туриш керак.

Акмал Мозговойнинг ўтиш жараёни ҳақида

– У ростдан ҳам хорижда ўйнаб кўрмоқчи эди. Биз келишувни тайёрладик, лекин эмират клуби «Насаф»га пулини бир йўла тўлай олмади. Биз молиялаштириш манбасини топдик ва келишувни амалга оширдик. Акмал – жуда юқори даражадаги футболчи, янги чемпионатда ўзини албатта кўрсатади.

– Бу трансферлардан агентлик қандай даромад олди?

– Рақам айтмайман. Ростини айтсам, футболчиларимизга талаб кўпчилик ўйлагандек баланд эмас. Асосийси – четга кетиш эмас, балки қачон кетиш. Чунки ҳар бир ўтиш – ўзбек футболи учун масъулият ва унинг имижини шакллантириш. Хусанов, Элдор ва Аббос бу ишни уддалади. Лекин бошқаларда ундай бўлмади. Жаҳон чемпионатига чиқиш катта ютуқ, лекин хориж чемпионатига ўтиш осон эмас. Агар миллий жамоа халқаро майдонда сенсация кўрсатганида, бу жараён енгиллашарди.

– Ёш футболчилар профессионаллик жиҳатидан сизнинг авлодингиздан устунми?

– Ростини айтсам, ҳозирги ёшлар имконият жиҳатидан анча яхши. Улар тўғри овқатланиш, индивидуал машғулотлар ва кўплаб манбалардан фойдаланиш имкониятига эга. Бизда эса бу муаммо эди. Биз нафақат уларни кузатамиз, балки улар билан профессионаллик ҳақида суҳбатлашамиз, уларни тўғри йўлга йўналтирамиз. Бу ёшда энг муҳими – футболдан чалғимаслик.

– Ноябр ойидаги мундиалдан нима кутаяпсиз?

– Энг аввало, муносиб иштирок. Бу жамоа таркибида кўп иқтидорли футболчилар бор. Улар орасида мижозларимиз ҳам етарлича. «Кичик мундиал» – футбол ярмаркаси каби. Машҳур клублар скаутлари турнирни бошидан охиригача кузатишади. Барча шароит яратилган – йигитларимизга майдонга чиқиб, ўзларини кўрсатиш қолди.

– Келгусидаги режаларингиз қандай?

– Аввало, қишки трансфер ойнасига тайёргарлик. Бизни катта иш кутаяпти. Умид қиламанки, ёшлар ўртасидаги жаҳон чемпионатидан сўнг яна кўпроқ ишлар бўлади. Ростини айтсам, мен бундан қўрқмайман, чунки ишимдан завқ оламан.