Элдор Шомуродов: "Абрахам билан рақобатимиз..."

SPORTS.uz эксклюзив интервьюларни тақдим этишда давом этади. Бу сафар Римнинг "Рома" клуби футболчиси - Элдор Шомуродов мухлисларни қизиқтирган саволларга жавоб берди. Видеоинтервью давомида "Рома" аъзоси билдирилган фикрларни сайтимиз ўқувчиларига қулай бўлиши учун ёзма версиясини эътиборингизга ҳавола этамиз.

"Рома" жамоасига тўлиқ мослаша олдингизми?

- Ҳаммаси яхши, Яратганга шукр. Мослашиб бўлдим, деб айта оламан. Жамоадошларим билан яхши чиқишиб кетдик.

Жозе Моуриньо сизни кўпроқ захирада қолдираётгани нима билан боғлиқ?

- Бу мураббийнинг қарори. Шу боис, нимадир дейишим мушкул. Шунга қарамай, менга берилган вақтда ўзимни яхши томонларимни кўрсатишга ҳаракат қиляпман. Қолгани мураббийнинг қўлида. Таркибни Жозе танлайди. Мен қўлимдан келган барча ишни қиляпман.

Терма жамоамиз ЖЧнинг финал босқичига йўл олмагач, умуман янги кўриниш олмоқда. Бу жамоанинг потенциалини қандай баҳолайсиз?

- Барчамиз бирга ҳаракат қиляпмиз. Йигитларнинг аксарияти эндигина миллий жамоада кўриниш беришни бошлаган. Улар ҳали ёш. Кўпроқ тўп тепиб, ўзига бўлган ишончини ошириб олиши керак. Потенциал бор. Бизда ўз устимизда ишлаш учун етарлича вақт бор. Авлодлар алмашинувини амалга ошириб, янги жамоа қуриш мумкин. Бу футболимиз учун катта плюс бўлди.

Нобель Арустамян сиз билан интервью қилиш учун Италияга борганида, сиз итальянчани ўрганаётган эдингиз. Бу жараён қандай кетмоқда?

- Римга кўчиб ўтгач, ўқитувчим билан ишлашни имкони бўлмаяпти. Ҳозир асосан, футболчилар билан суҳбатлашиб, ўрганишга ҳаракат қиляпман. Очиғи, анча итальянчани тушуниб қолдим. Сўзлашишда муаммолар бўлишига қарамай, рўпарамдаги инсонни нима ҳақида сўзлаётганини англай оламан.

Келажакдаги режаларингиз қандай? "Монако" ё "Севилья"га кўчиб ўтишингиз ҳақидаги миш-мишлар ростми?

- Ҳозир фақат "Рома"даги фаолиятим ҳақида ўйлаяпман. Нима бўлишини олдиндан айтиш мушкул. Ҳаммаси Яратганга аён. Асосий мақсадим - ўз ўйиним билан "бўрилар" сафидаги ўрнимни топиш. Қолгани ҳақида ўйлаганим йўқ.

Тэмми Абраҳам билан рақобат ўзаро муносабатларингизга қандай таъсир қилди?

- Ўзаро алоқаларимизга ҳеч қандай таъсир қилмаган. Футболдан ташқари ҳаётда анча яхши чиқишамиз. Тез-тез суҳбатлашиб турамиз. Бу омил муносабатларимизга умуман таъсир кўрсатмайди.

"Рома"даги энг қалин дўстингиз ким?

- Кўпроқ, Генрих Мхитарян. Сабаби, у билан кўпроқ мулоқотда бўламан. Рус тилида сўзлашгани боис бир-биримизни яхши тушунамиз. Шу боис, айнан у "Рома"даги энг қалин дўстимга айланган.

"Женоа" жамоасини кузатиб боряпсизми?

- Албатта, кузатиб боряпман. Клуб анча мураккаб аҳволда қолган. Мураббий алмашгач, энди вазиятни ўнглашади, деган умиддаман.

Терма жамоа сардорига айланганингиздан сўнг терма жамоа мухлислари сиздан кўпроқ нарса кутмоқда. Босимни енгиб ўтишга тайёрмисиз?

- Ҳеч ким сардор бўлиб туғилмайди. Масъулиятни ҳис қилиб турибман. Мухлисларимиз олдидаги вазифам нима эканлигини сезиб турибман. Билдирилган ишончни оқлашга ҳаракат қиламан. Гап нима ҳақида бораётганини жуда яхши тушуниб турибман.