Elmira Gulyamova: "Bunyodkor" faqat chempionlik uchun kurashadi!

Bugun ayollar o‘rtasidagi O‘zbekiston Superkubogi oldidan matbuot anjumani o‘tkazildi. Unda dastlab, “Bunyodkor-W” bosh murabbiyi Elmira Gulyamova ishtirok etib, quyidagi fikrlarni bildirib o‘tdi:

“Bunyodkor-W” jamoasi ko‘p yillardan buyon faqat yuqori o‘rinlar uchun harakat qilib keladi. Shunday ekan, ertangi bellashuvda ham jamoamiz jangovar ruhda maydonga tushadi. To‘g‘ri, o‘tgan mavsum kubok finalida mag‘lub bo‘lgan edik. Lekin, shuni ta’kidlash kerakki, o‘sha uchrashuvga biroz charchagan holatda etib kelgandik. Boisi, Iordaniyada o‘tgan ayollar jamoalari o‘rtasidagi Osiyo chempionatida ishtirok etdik. Qolaversa, tarkibda yo‘qotishlar bor edi. Hujumdagi asosiy qurolimiz bo‘lgan Lyudmila Karachik jarohati sabab o‘sha bellashuvni o‘tkazib yuborgan, jamoadagi ruhiyat ham u qadar yaxshi emas edi. Finalda ushbu omillar o‘z ta’sirini ko‘rsatgandi.

Dildora Nozimova, Saida Galimova kabi etakchilarning jamoamizni tark etishi, albatta, biz uchun katta yo‘qotish bo‘ldi. Ular katta tajribaga egalar. Ammo, futbolchi ketishni istaganida, uni majburan ushlab qololmaymiz. Dilrabo Asadovaga Qozog‘istondan takliflar bo‘ldi. Bunday futbolchilarning jamoamizni tark etishi afsuslanarli. Buni yaxshi jihati ham bor, tarkib 60-70 foizga yosharganini qayd etish joiz. Afsuski, mavum avvaliga qadar tarkibni o‘zim istagan darajada shakllantira olmadim. Buning uchun vaqt ham, moliyaviy imkoniyat ham bo‘lmadi. Lekin, bu “Bunyodkor-W” chempionlik uchun kurashmaydi, degani emas. Biz har doim o‘z oldimizga yuqori maqsadlarni qo‘yamiz. Jamoa imijini saqlab qolishga intilamiz. 

“Bunyodkor-W” 2018 yildan buyon o‘zbek futbolida katta yuqutlarga erishib kelmoqda. Bundan keyin ham shunday maqsadlar qo‘yiladi. Ertaga Superkubokni qo‘lga kiritish uchun maydonga tushamiz.

Lyudmila Karachik: Yangi mavsumga tayyormiz. Maqsadimiz - g‘alaba qozonish. Tarkibda o‘zgarishlar bor, ammo u qadar katta emas. Jarohatdan tiklanib ulgurdim, ertangi bahsga 100 foiz tayyorman.

Umida Zoirova: Biz Superkubokda birinchi marta o‘ynamayapmiz. Bu borada tajribaga egamiz. “So‘g‘diyona-W” tarkibidagi legionerlar? Ular ham o‘zimiz singari futbolchilar. Tarkib kuchaygandir, lekin biz ham ulardan kam emasmiz.

O‘zPFL matbuot xizmati