Энди Месси ва Роналду йўқ. Гол уриш Левандовскига қолди

“Барселона” ҳужумчиси Роберт Левандовски Европа Чемпионлар лигасининг гуруҳ босқич биринчи турида “Антверпен” жамоаси дарвозасини ишғол қилди.

Бу польшалик тўпурар учун Еврокубоклардаги 100-гол бўлди. Левандовски голларидан 92 тасини Чемпионлар лигасида ва 8 тасини Европа Лигаси доирасидаги ўйинларда киритган.

Бу натижага эришиш учун Левандовскига 139 та учрашув кифоя қилди.

Роберт Европа майдонларида “Лех” таркибида 16 та ўйинда олтита гол урган. “Боруссия Дортмунд”да 36 та баҳсда 18 та, “Бавария”да 79 та беллашувда 69 та ва “Барселона”да саккизта учрашувда еттита тўп киритган.

Левандовски Еврокубоклардаги голлари сонини 100 та етказган учинчи футболчи бўлди. Бунгача бу ишни Лионель Месси ва Криштиану Роналду уддалаган. Европа футболини тарк этган бу юлдузлардан Месси 129 та, Роналду 145 та гол муаллифи бўлган.