Эндрик янги жамоа танлади

“Реал”да ўйин амалиётисиз қолиб кетаётган бразилиялик ҳужумчи Эндрик қишки трансферлар ойнаси очилиши билан Франция чемпионатига йўл олиши кутилмоқда.

L'Équipe нашрининг ёзишича, “Лион” клуби мутасаддилари 19 ёшли футболчи трансфер бўйича “Реал” билан ўтказилаётган музокараларни ижобий якунлашга яқин турибди.

Манбанинг ёзишича, “Лион” бош мураббийи Паулу Фонсека Эндрик билан телефон орқали суҳбатлашиб, уни лойиҳанинг келажаги ва унда футболчига бериладиган имкониятларга ишонтира олган.

Эндрик бир неча ҳафтадан бери мадридликлар билан сотиб олиш ҳуқуқисиз ижара имконини муҳокама қилмоқда.

“Реал” 2024 йилнинг ёзида Эндрикни катта умидлар билан трансфер қилган эди. Ўтган мавсум ёш ўйинчи аввалги бош мураббий Карло Анчелотти қўл остида 37 маротаба майдонга тушган эди.

Жаома бошқаруви Хаби Алонсога ўтгач, Эндрикка ўйин амалиёти берилмаяпти. Футболчи Бразилия терма жамоасидан жаҳон чемпионатида иштирок этиш учун чақирув олиш мақсадида бошқа клубга ўтишга кўнди.