Энг содиқ футболчилар рейтинги тузилди

BBC Sport нашри фақат бир клубда бутун профессионал фаолиятини ўтказган энг буюк футболчилар рейтингини тузди.

Рўйхатда биринчи ўринни “Рома”нинг афсонавий сардори Франческо Тотти эгаллади.

Англия нашри уни бир клубга содиқликнинг асосий рамзи, деб атади ва италиялик футболчи Мадриднинг “Реал” жамоаси каби гранд клублар таклифларини рад этиб, фаолиятини тугатгунча ўз жамоасида қолганини таъкидлади.

Иккинчи ўринни бутун фаолияти давомида “Милан” шарафини ҳимоя қилган ва жаҳон футболининг энг катта афсоналаридан бирига айланган ҳимоячи Паоло Мальдини эгаллади.

Учинчи қаторга “Манчестер Юнайтед”нинг собиқ ярим ҳимоячиси Райан Гиггз қўйилди. Уэльслик футболчи бутун фаолиятини “Олд Траффорд”да ўтказиб, клуб билан кўплаб совринларни қўлга киритган.

Тўлиқ рўйхат қуйидагича кўриниш олган:

1. Франческо Тотти («Рома»)
2. Паоло Мальдини («Милан»)
3. Райан Гиггз («Манчестер Юнайтед»)
4. Тони Адамс («Арсенал»)
5. Карлес Пуйоль («Барселона»)
6. Жейми Каррагер («Ливерпуль»)
7. Мэтт Ле Тиссье («Саутгемптон»)
8. Джузеппе Бергоми («Интер»)
9. Лев Яшин («Динамо» Москва)
10. Иньяки Уильямс («Атлетик»).

Рейтинг муаллифлари таъкидлашича, замонавий футболда бундай клубга содиқлик трансферлар, тижоратлашув ва футболнинг глобаллашуви фонида тобора кам учрамоқда. “Топ-10”га кирган футболчилар орасида фақатгина Иньяки Уильямс “Атлетик” шарафини ҳимоя қилишда давом этмоқда.