Эрон ўзини "зулм остида" ҳис қилмоқда

Эрон 2:2 Янги Зеландия: Жаҳон чемпионати олдидан турли низолар ва муаммоларга дуч келган Эрон терма жамоаси навбатдаги ўйинида ҳам осон баҳс ўтказмади. Янги Зеландияга қарши учрашув 2:2 ҳисобида ниҳояса етди, аммо майдондаги натижадан кўра, ўйин атрофидаги вазият кўпроқ муҳокама қилинмоқда. Учрашувдан сўнг Эрон бош мураббийи Амир Галеноиӣ ФИФА ва АҚШ ҳукуматига нисбатан норозилик билдирди. Унинг айтишича, жамоага Лос-Анжелесни дарҳол тарк этиш кераклиги айтилган.

"Биз ҳавода сафар қилишга жуда кўп вақт сарфладик. Бугунги ўйиндан сўнг тикланишимиз учун ҳам етарли фурсат беришмади. Дарҳол кетишинглар керак, дейишди. Биз учун тикланиш жуда муҳим, лекин биздан Тихуанага қайтиш талаб қилинди, бу эса жамоани жиддий безовта қиляпти", — деди Галеноиӣ.

"Нега бизга бундай муомала қилаётганини билмаймиз. Жуда ғалати ҳолат. Режаларни бошқалар тузаяпти, қарорлар бошқа ерда қабул қилинмоқда. Биз ўйиндан икки кун олдин етиб келишимиз керак эди, лекин рухсат беришмади. Бугун кечқурун қолиб, эртага тушлик пайтида қайтишимиз керак эди, аммо нима учун бу ўзгарганини ҳам, нега бундай бўлаётганини ҳам бизга тушунтиришмади", — дея қўшимча қилди мураббий.

Галеонийнинг таъкидлашича, жамоа чемпионатда энг қийин шароитда қолган терма сифатида иштирок этмоқда: "Бутун жаҳон чемпионатида энг кўп зулм кўраётган жамоа — бизнинг жамоа. Федерация бу ерда деярли йўқ. ОАВ вакилларимиз ҳам бу ерга келмаган. Маъмурият  аъзоларининг кўпчилиги йўқ. Илгари алмаштиришлар ва тактик қарорларга ёрдам берадиган мураббийлар гуруҳимиз бор эди, бу сафар эса ундай имконият бўлмади. Техник зонадаги кўпчилик бир вақтнинг ўзида бир неча вазифани бажаришга мажбур бўлди".

Эрон терма жамоаси сардори Меҳди Таремӣ ҳам вазиятни кескин танқид қилди. У жамоага бўлаётган муносабатни "фожеа" деб атади ва ФИФА президенти Жанни Инфантино кийиниш хонасига кириб, жамоага ёрдам беришга ваъда берганини маълум қилди. Ижтимоий тармоқларда тарқалган видеолавҳада Инфантино футболчиларга "сизлар ҳамма нарсадан кучлироқсизлар", дея мурожаат қилади ва "тарих яратяпсизлар, бутун дунё сизларни кузатяпти", дея қўшимча қилади.

Маълумотларга кўра, Инфантино футболчиларга Эрон делегациясининг виза ололмаган аъзолари ҳам қолган гуруҳ босқичи ўйинлари учун АҚШга келишига ёрдам беришга ҳаракат қилишини айтган.