Етмиш миллион тўлаб, вундеркиндни олаверинг!

Англия Премьер-лигасида барқарор ўйини билан мухлису мутахассислар эътиборини тортаётган “Борнмут” клуби раҳбарияти жамоанинг ёш иқтидори Эли Крупини сотиб юборишга тайёрлигини билдирди.

Англия клуби 2026 йилнинг ёзида 19 ёшли футболчи учун 70 миллион евро санайдиган клуб билан трансферни муҳокама қилишга тайёр.

Бу ҳақда Football Insider нашри хабар берди.

Манбага кўра, 19 ёшли франциялик форвардга энг катта қизиқишни “Манчестер Юнайтед” билдирмоқда. Шунингдек, “Ливерпуль”, “Арсенал” ва “Челси” каби қудратли клублар ҳам Крупини беэътибор қолдираётгани йўқ.

Крупи жорий мавсумда 31 та ўйинда 11 та гол урди. Унинг “Борнмут” билан шартномаси 2030 йил 30 июнга қадар амал қилади. Футболчи ушбу клубда 2025 йил февраль ойидан бери ўйнамоқда.

Аввал хабар қилинганидек, Крупи Англия Премьер-лигасида дебют мавсумида 10 ёки ундан кўп гол урган илк ўсмир футболчи сифатида рекорд ўрнатди.

Бунгача бу натижага 1999-2000 йилги мавсумда “Ковентри Сити” сафида Робби Кин эришган эди.

Transfermarkt портали Крупининг трансфер қийматини 40 миллион евро деб баҳоламоқда.