Европа “Топ-5” чемпионатларининг енгилмас жамоалари

Замонавий футболда мавсумни мағлубиятсиз якунлаш қийин вазифалардан бири. Айниқса, “топ-5” лигаларда буни амалга ошириш анча машаққатли иш.

Жорий мавсумда кучли бешлик чемпионатларида фақатгина “Байер” ҳали енгилгани йўқ. Бироқ чемпионат якунланишига бир неча ой бор ва бу мағлубиятсиз сериясини ушлаб қолиш осон бўлмаслиги аниқ.

Эътиборингизга Англия, Испания, Германия, Италия ва Франция чемпионатларидан таркиб топган кучли бешлик лигаларида мавсумни мағлубиятсиз якунлаган жамоалар ҳақида маълумот берамиз.

“Престон Норт Энд” – 1888/1889 йилги мавсум (Англия)

“Престон Норт Энд” Англия лигасида 22 та учрашувдан 18 тасида ғалаба қозонган ва тўрт бор дуранг ўйнаб, мамлакат чемпиони бўлган.

“Атлетик Бильбао” – 1929/1930 йилги мавсум (Испания)

Ла Лигада ғолиб чиққан “Атлетик Бильбао” мавсумни мағлубиятсиз якунлаган биринчи испан клуби сифатида тарихда қолган. Басклар лигадаги 18 та учрашувда бирор марта таслим бўлмади.

“Реал Мадрид” – 1931/1932 йилги мавсум(Испания)

“Реал” футболчилари ҳам илк бор чемпионликни қўлга киритган мавсумда чемпионатни бирорта мағлубиятсиз якунлаган.

“Перуджа” – 1978/1979 йилги мавсум (Италия)

Қизиғи шундаки, “Перуджа” футболчилари чемпионатни мағлубиятсиз якунлаган бўлса-да, чемпионликдан қуруқ қолган. Улар 30 та учрашувдан 19 тасида дуранг қайт этгани боис, “Милан” футболчилари скудеттони “Перуджа”дан тортиб олганди.

“Милан” – 1991/1992 йилги мавсум (Италия)

“Милан” чемпионатнинг 34 та учрашувидан барчасини ижобий натижа билан якунлади ва бирор маротаба енгилмаган ҳолда чемпионликка сазовор бўлди.

Фабио Капелло шогирдлари кейинги мавсумда ҳам муваффақиятли қатнашиб, мағлубиятсиз сериясини 58 та учрашувга етказди ва бу натижа ҳамон Италия рекордни ҳисобланади.

“Арсенал” – 2003/2004 йилги мавсум (Англия)

“Арсенал” сўнгги 100 йилда мавсумни мағлубиятсиз якунлаган биринчи инглиз жамоаси бўлди. Арсен Венгер жамоасининг мағлубиятсиз серияси кейинги мавсумда ҳам давом этиб, 49 та учрашувга етди.

“Ювентус” – 2011/2012 йилги мавсум (Италия)

“Ювентус” юқори дивизионга қайтганидан кейин биринчи чемпионлигини юқори даражадаги натижалар билан қўлга киритди. Антонио Конте шогирдларини 38 та учрашув давомида ҳеч қайси жамоа тўхтата олмади.