Файзуллаев, Роналду ва Месси билан ўйнаган юлдуз фаолиятини якунлади

"Барселона", "Ювентус", ЦСКА ҳамда Босния ва Герсеговина терма жамоалари собиқ ярим ҳимоячиси Миралем Пьянич фаолиятини якунлаганини расман эълон қилди.

"Мен бир умр ўз куйимни чалиб келдим. Ҳар бир  тўпга тегиниш, ҳар бир узатма, ҳар бир зарба - бу нотадир. Футбол менинг мусиқам, майдон менинг пианинойим эди. Бу ўйиннинг гўзаллигини эшитишингизни орзу қилардим.

Бугун юрагим шукроналикка тўлиб айтишим мумкинки, бу симфония менинг ҳаётим эди. Уни сизлар билан баҳам кўриш мен учун шараф эди.

Ҳар доим менинг асосий таянчим ва кўринмас кучим бўлган оиламга алоҳида миннатдорчилик билдираман. Мураббийларга, орзуларим, қурбонликларим ва ғалабаларимни баҳам кўрган жамоадошларимга. Техник ходимлар, шифокорлар ва саҳна ортида ишлаган барчага. Мухлисларга, бу ўйиннинг жонига.

Ушбу мусиқанинг бир қисми бўлганингиз учун ҳаммага раҳмат", - деб ёзди Пьянич ижтимоий тармоқдаги саҳифасида.

35 ёшли яримҳимоячининг фаолиятидаги сўнгги клуби Москванинг ЦСКА клуби бўлиб, у ўтган ёзда жамоани тарк этганди. "Қизил-кўклар" сафида Пьянич барча турнирларда 25 та ўйин ўтказиб, 3 та голли узатмани амалга оширди.