Файзуллаев бўлмаганида ЦСКА расво бўларди! Экспертлар Аббосга яна қандай баҳо берди?
Файзуллаев охирлаб қолган мавсумда Россия Премьер-лигасининг асосий қаҳрамонларидан бирига айланди. 20 ёшли футболчимиз мавсумнинг энг яхши футболчиси ва мавсумнинг кашфиёти каби номинациялар бўйича ғолибликка даъвогарлик қилмоқда.
Россиялик футбол экспертлари ўзбек футболчисининг истеъдоди ва имкониятларини юқори баҳоламоқда.
Sports.uz портали ўзбекистонлик ишқибозлар эътиборига Россия футболининг ёрқин фигураларининг Аббосбек Файзуллаев ҳақидаги фикр-мулоҳазаларини ҳавола этади.
Александр Мостовой, “Спартак” (Москва), “Бенфика”, “Кан”, “Страбур”, “Сельта”, “Алавес” жамоалари собиқ футболчиси:
Аббосбек Файзуллаев — Россия Премьер-лигасининг ҳақиқий кашфиёти. Бу йигит чемпионимизга чақмоқдек кириб келди ва ЦСКАнинг ҳужум чизиғидаги муаммоларга барҳам берди.
Агар Аббос тез мослашиб, юқори савияда ўйнаб кета олмаганида, бу мавсум “армиячилар” учун расво ўтган бўларди. Кўпчилик ёш Файзуллаевдан бунақа ёрқин дебютни кутмаган эди, деб ўйлайман.
Владимир Пономарёв, ЦСКА собиқ футболчиси:
ЦСКА чемпионлик учун курашиш учун таркибини кучайтиришга жиддий эътибор қаратиши керак. ЦСКАнинг энг катта камчилиги таркибнинг кучсизлигида.
Бу мавсум жамоани кучайтириш учун келган янги ўйинчилар ҳеч кимни ҳайратга сола олгани йўқ. Фақатгина Аббосбек Файзуллаев “армиячилар” ўйинига сифат қўша олди холос. Қолган трансферлар кутилган натижани бермади. Атон Заболотний даражасидаги футболчилардан эса, тезроқ қутилиш керак.
Евгений Алдонин, ЦСКА собиқ футболчиси:
Аббосбек Файзуллаев ўзини ёрқин кўрсата олди ва мавсумнинг кашфиёти бўлди. “Балтика” футболчиси Данила Козловни ҳам ажратиб кўрсатиш мумкин. У анча етук даражада ўйнаяпти.
Файзуллаев ҳақида тўхталсак, у жуда ёш бўлишига қарамай, савияни юқори ушлаб турибди. Европада 20 ёшли футболчиларнинг деярли ҳаммаси юқори даражада ўйнайди. Файзуллаев ўсишда давом этиши лозим. Унинг ЦСКАда катта иштиёқ билан ўйнаётгани одамнинг ҳавасини келтиради.
Аббосбек Файзуллаев Россия Премьер-лигасидаги дебют мавсумида ҳозирча 21 та учрашувда тўртта гол ва еттита ассист муаллифи бўлди. Легионеримиз гол+пас тизимида ўнта самарали ҳаракатни амалга оширган мавсумнинг энг ёш футболчиси сифатида рекорд ўрнатди.
Комментарии