Бунақаси бўлмаган: Файзуллаев бир ўйинда бир неча рекордда қатнашди!
Россия Премьер-лигасининг 29-туридан ўрин олган “ПАРИ Нижний Новгород” ва ЦСКА ўртасидаги учрашув голларга ва рекордларга бой бўлди.
Пойтахтлик “армиячилар” меҳмонда тўп тепганига қарамай, нижний новгородлик футболчиларни аяб ўтирмади. Ҳужумкор ўйин кўрсатган Владимир Федотов шогирдлари саккизта тўп киритилган баҳсда 6:2 ҳисобида зафар қучди.
Нижний Новгороддаги ўйин турнинг сўнгги учрашуви бўлгани боис аксарият рекордлар айнан мана шу баҳс ҳиссасига тўғри келди.
Россия Премьер-лигаси тарихида илк бор бир турда 39 та гол урилди ва мазкур кўрсаткич янги рекорд сифатида рўйхатга олинди. Бу турнир йўлга қўйилганидан бери энг кўп гол киритилган тур бўлди. Аввалги рекорд 36 та голдан иборат бўлиб, бу кўрсаткич икки бор – 2006 ва 2012-2013 йилги мавсумларда қайд этилганди.
Баҳсда фаол ўйнаган Аббосбек Файзуллаев иккита ассисти билан ушбу рекордга ўз ҳиссасини қўшди.
Иккинчи бўлимда жамоадошлари Виктор Давила ҳам Антон Заболотнийга голли пас узатган ҳамюртимиз шахсий рекордини ҳам ўрнатди.
Аббосбек Файзуллаев жорий мавсумда ўнта ва ундан кўп самарали ҳаракатни амалга оширган Премьер-лиганинг энг ёш ўйинчиси бўлди. 20 ёшли легионеримиз ҳисобида чемпионатнинг 21 та учрашувида урилган тўртта гол ва еттита ассист бор.
Бундан ташқари, ҳужумкор футболчимиз Россия кубоги мусобақаси доирасида ўнта беллашувда битта гол ва учта ассист муаллифи бўлган.
Аббосбек Файзуллаев жорий мавсумда гол+пас тизимида камида ўнтадан балл тўплаган Константин Тюкавин (21 ёш), Бенхамин Гарре (23 ёш), Эдуард Сперцян (23 ёш), Максим Глушенков (24 ёш), Егор Голенков (24 ёш) ва бошқа ўйинчилардан ёш ҳисобланади.
ЦСКА ҳимоячиси Келлвен учрашувда голли пас бериб, мавсумдаги ассистлари сонини олтитага етказиб олди ва натижа ҳам мавсум рекорди бўлди. Чунки ҳали лигада бирорта ҳимоячи бу қадар кўп ассист қилмаган.
“ПАРИ Нижний Новгород” бу баҳсда антирекорд қайд этди. Сербиялик мутахассис Саша Илич шогирдлари Россия чемпионатлари тарихида кетма-кет иккита беллашувда олтитадан гол ўтказиб юборган биринчи жамоа бўлди.
Бунгача чемпионат доирасидаги 8000 ортиқ учрашувда бунақа натижа кузатилмаган эди.
Фикрлар