Файзуллаев Туркияда узоқ қолмайди
Аббосбек Файзуллаев учун янги мавсум муҳим аҳамият касб этади. Чунки Ўзбекистон миллий терма жамоаси 2026 йилнинг ёзида ўз тарихида илк маротаба жаҳон чемпионатида иштирок этади.
Бўлажак жаҳон кубогида ўзбекистонлик мухлисларнинг Аббосбек Файзуллаевдан умиди катта. У ёш бўлишига қарамай, мундиалнинг минтақавий саралаш турнирида етакчилик қобилиятини намойиш қилди ва мураккаб вазиятларда ўйини, голлари ва ассистлари билан бош жамоамизнинг муваффақиятига жуда катта ҳисса қўшди.
Миллий жамоамиз етакчилари қаторига қўшила олган Аббосбек Файзуллаев АҚШ, Мексика ва Канада ҳамкорликда қабул қиладиган мундиалгача юқори спорт формасида етиб бориш учун бошланаётган мавсум давомида мунтазам ўйин амалиётига эга бўлиши, жиддий тайёргарлик кўриши лозим бўлади.
21 ёшли легионеримиз кейинги йилларда анча ривожланиб бораётган Туркия Суперлигасига кўчиб ўтиши айтилмоқда. “Истанбул Башакшеҳир” Файзуллаев учун ЦСКА клубига 7,5 миллион евро бадал пули тўлаши ва бу сумма турли бонуслар эвазига 10 миллион еврога етиши мумкин.
Айни пайтда Россия футболи экспертлари Файзуллаев трансферини жуда кўп муҳокама қиляпти. Туркия футболига ихтисослашган россиялик футбол эксперти ва шарҳловчиси Элвин Керимов Ўзбекистон миллий терма жамоаси ҳужумкор футболчиси Аббосбек Файзуллаевнинг “Истанбул Башакшеҳир”га ўтаётганига муносабат билдирди.
- “Истанбул “Башакшеҳир” мунтазам Еврокубокларда иштирок этиб келмоқда. Гарчи Конференциялар лигасида бўлса ҳам, Аббосбек Файзуллаевда Европа майдонларида тўп тепииш имкони юзага келади.
“Башакшеҳир” сўнгги йилларда миллий чемпионатда юқорига кўтарила олгани йўқ. Чунки “Галатасарой” ва “Фенербаҳче” трансферлар, бюджет ва барча кўрсаткичлар бўйича анча илгарилаб кетган. Ҳатто “Бешиктош” ҳам улар билан рақобат қила олмаяпти.
Файзуллаев учун “Башактеҳир” варианти вақтинчалик. У бу жамоадан “топ-лига”ларга ёки Туркиянинг қудратли клубларига йўл олиши эҳтимоли катта.
Аббоснинг бошқа таклифларни кутишида ҳеч қандай мантиқ йўқ эди. Туркларнинг таклифи ўйинчининг ўзига ҳам, ЦСКА учун ҳам жуда манфаатли бўлиб чиқди. Бахтиёр Зайнутдинов ва Элдор Шомуродов каби Файзуллаевни Истанбулда яшаб, тўп тепиш имконияти ўзига ром этгандир.
Чунки маданий муҳит нуқтаи назаридан Ўзбекистон ва Осиё мамлакатлари ўйинчиларига Туркия шароити жуда қулай ҳисобланади, - деди Эльвин Керимов.
Эслатиб ўтамиз, Аббосбек Файзуллаев “Пахтакор” тарбияланувчиси ҳисобланади. 2023 йилнинг августида ЦСКАда иқтидорли ўйинчини 500 минг евро эвазига ўз сафига қўшиб олди.
Аббос Россиядаги дебют мавсумидаёқ ёрқин ўйин кўрсатиб, Премьер-лигасининг асосий кашфиёти сифатида эътироф этилди. Легионеримизнинг “армиячилар” жамоасидаги фаолияти бесамар бўлгани йўқ.
Файзуллаев қатор индвидуал ютуқларни қўлга киритишдан ташқари, ЦСКА билан бирга Россия чемпионати бронза медаль совриндори, мамлакат кубоги ва Суперкубоги соҳиби бўлди.
Эксперт: Бу футболчи Ҳусановнинг йўлини тўсяпти
Файзуллаевнинг ЦСКАдан кетиш сабаблари айтилди
Фикрлар