ФИФА "Бунёдкор"дан трансфер тақиқини олиб ташлади

Маълумки, шу йилнинг 7 февраль куни ФИФА “Бунёдкор” собиқ футболчилари Ривалдо ва Денилсон шикоятлари бўйича қайта иш очган бўлиб, орадан 15 кун ўтиб клуб футболчилар олдидаги қарздорлик мажбуриятини бажариши лозимлиги тўғрисида қарор чиқарганди.

ОФК лицензиялаши талабидан келиб чиқиб, профессионал футбол клуби йилнинг 31 март санасига қадар қарздорлик билан боғлиқ масалаларни ҳал этиши лозим. Олиб борилган музокаралар натижасида томонлар 30 март куни келишувга эришди. Натижада “Бунёдкор” лицензиялаш платформасига лозим ҳужжатларни юклашга улгурди.

ФИФА қарорига кўра, “Бунёдкор” Ривалдо ва Денилсон олдидаги қарздорликни шу йилнинг 7 апрель санасига қадар бартараф этиши керак эди. Янги келишувга кўра тўланиши лозим бўлган суммалар сезиларли кўринишда камайтирилди. Қўшимчасига, келишилган сумма Денилсонга 2026 йилгача уч қисмга бўлиб тўланадиган бўлди. Ривалдо билан ҳисоб-китоб эса 2028 йилга қадар ҳар йили бир мартадан амалга ошириладиган бўлди.

ФИФА мазкур ишни тегишли тартибда ўрганиб чиққанидан сўнг клубга нисбатан белгиланаган трансфер тақиқини олиб ташлади.

Эндиликда “Бунёдкор” собиқ футболчилари билан келишув шартларига ўз вақтида амал қилиши керак бўлади.