ФИФА "Фенербахче"га янги футболчиларни рўйхатдан ўтказишни тақиқлади

Халқаро футбол ассоциациялари федерацияси (ФИФА) Туркиянинг "Фенербахче" клубига янги футболчиларни рўйхатдан ўтказишни вақтинча тақиқлади. Бу ҳақда ташкилотнинг расмий сайтида маълум қилинди. Қарорга кўра, чеклов учта трансфер ойнаси давомида амал қилади ва 25 сентябрдан кучга кирган.

"Фенербахче" раҳбариятининг тушунтиришича, санкцияга сабаб сифатида 2024 йилда "Севилья" клубидан келиб қўшилган ҳужумчи Юссеф Эн-Несири трансфери бўйича қарз кўрсатилган. Туркияликлар марокашлик футболчи учун тўланиши керак бўлган навбатдаги тўловни 30 апрелга қадар амалга оширмаган.

Клуб маълумотига кўра, кечиккан сумма аллақачон тўлиқ қопланган, бироқ "Севилья" шартнома бўйича кейинги тўловни ҳам дарҳол ўтказишни талаб қилган. "Фенербахче" қарздорликни душанба кунигача тўлиқ ёпишга ваъда берган. Шунинг ортидан, кутилганидек, клубдан янги футболчиларни рўйхатдан ўтказишга қўйилган тақиқ бекор қилиниши мумкин.