ФИФА: Оғзини ёпганни майдондан ҳайданг!

Халқаро футбол федерацияси (ФИФА) президенти Жанни Инфантино майдондаги можаролар вақтида қўли ёки кийими билан оғзини ёпадиган футболчиларга тўғрида тўғри қизил карточка беришни жорий этишни таклиф қилди.

- Бундай ишораларга мурожаат қилаётган ўйинчилар айтилаётган гапни яширишга уриняпти. Демак, улар ўзлари қабул қилиб бўлмайдиган сўзларни айтаётганини яхши англайди. Агар инсон оғзини ёпса, демак, унинг яширадиган гапи бор.

Ирқчилик кўринишларига қарши биз қатъий жавоб қайтаришимиз ва самарали чоралар кўришимиз шарт. Бироқ воқеа шароитини ҳам ҳисобга олиш муҳим. Кучли ҳиссий ҳолатда бўлган одам хатога йўл қўйиши мумкин ва кейинчалик ундан чин дилдан пушаймон бўлади.

Шунинг учун оммавий равишда узр сўраганлар учун жазони енгиллаштириш имкониятини ҳам кўриб чиқишимиз керак, - деди Жанни Инфантино.

Шунингдек, ФИФА президенти дискриминацион баёнотлар учун дисквалификациянинг энг кам муддатини, агар ўйинчи айбини очиқ тан олса, бешта ўйингача қисқартириш ташаббуси билан чиқди.

Жазони кучайтириш ғояси атрофидаги баҳслар Чемпионлар лигасининг 1/8 финалига чиқиш учун ўтказилган плей-офф учрашувидан кейин бошланди. Унда Португалиянинг “Бенфика” жамоаси ва Испаниянинг “Реал” клуби тўқнаш келган эди. Учрашув давомида “Реал” ҳужумчиси Винисиус Жуниор ҳакамга “Бенфика” ярим ҳимоячиси Жанлука Престианни футболкаси билан юзини ёпган ҳолда уни “маймун”, деб ҳақорат қилганини айтиб шикоят қилди.

Престианни ирқий ҳақоратни рад этди, аммо ноўрин сўзлар ишлатганини тан олди. Кейинроқ Европа футбол ассоциациялари иттифоқи (УЕФА) “Бенфика” ўйинчисини навбатдаги учрашувдан вақтинча четлатди.