ФИФА шарҳловчини чемпионатидан ҳайдаб юборди

ФИФА мутасаддилари парагвайлик шарҳловчи Хорхе Веранинг аккредитациясини бекор қилди. Бу ҳақда Ole нашри хабар берди.

20 июнь куни Парагвай терма жамоаси "ЖЧ-2026"нинг иккинчи турида Туркияга қарши баҳсда минимал ҳисобда ғалаба қозонди – 1:0.

Бироқ учрашув атрофидаги асосий баҳс ўйин натижаси эмас, балки биринчи бўлим охирида рўй берган вазият бўлди. Ҳакам Иван Бартон Мигель Альмиронни майдондан четлатди. Футболчи оғзини қўли билан беркитган ҳолда туркиялик Мерт Мюльдюрга мурожаат қилгани учун қизил карточка олди. Жаҳон чемпионати бошланишидан олдин рақибга оғизни беркитиб мурожаат қилиш учун майдондан ҳайдаш қоидаси жорий этилган эди.

Ушбу қарордан қаттиқ ҳаяжонланган Хорхе Вера жонли эфирда кескин баёнотлар билан чиқди.

«Ўғри, ўғри, ўғри. Бартон, сен ўғрисан. Сен футболни ўлдирдинг. ФИФА, сен футболни ўлдирдинг. Инфантино, бунинг учун жавобгар сенсан. Ўғрилар. Улар биздан бир ўйинчини тортиб олишди. Ўғрилар. ФИФА, футболни мана шундай ахлатга айлантирганинг учун жавобгарликни ўз зимманга ол. Алехандро Домингес, КОНМЕБОЛ раҳбари сифатида сен бирор иш қилишинг керак, жасорат топ, Инфантино билан камроқ суратга туш. Лаънат бўлсин бу ўғриларга. Жаҳон чемпионатида шундай манзарани кўришимиз керакми? Бу шармандалик», – деган Вера эфирда.

Орадан кўп ўтмай, журналист ўз сўзлари учун омма олдида узр сўради. Шунга қарамай, ABC телеканали уни жаҳон чемпионатига бағишланган барча дастурлардан олиб ташлашга қарор қилди.