ФИФА хавотирда! Жаҳон чемпионати финали кўчирилиши мумкин

АҚШда 2026 йилги жаҳон чемпионати финали Аргентина ва Испания терма жамоалари ўртасидаги беллашув ўрмон ёнғинлари сабабли кўчирилиши ёки бекор қилиниши мумкинлиги ҳақида хавотирлар пайдо бўлди, деб хабар бермоқда Ole.us.

Мутахассислар бундай сценарий эҳтимоли ҳозирча паст эканини таъкидламоқда. Испания — Аргентина учрашуви Нью-Йорк шаҳридаги «МетЛайф» стадионида бўлиб ўтишига уч кун қолди. Шу билан бирга, бу вариантни бутунлай инкор этиб бўлмайди. Турнир ташкилотчилари учун асосий устувор вазифа — ўйин иштирокчилари ва стадионга келадиган 80 мингдан ортиқ мухлислар соғлиғи ҳамда хавфсизлигини таъминлашдир. Шу боис учрашувни кечиктириш ёки бошқа санага кўчириш эҳтимоли кўриб чиқилиши мумкин. Бироқ шу билан бирга, мутахассислар дуд тарқалиши ва 19 июль, якшанба кунига қадар у жиддий муаммога айланмаслигига умид қилмоқда.

Маълумотларга кўра, ёнғинлардан келиб чиққан қалин дуд ҳудуди кенгайишда давом этмоқда ва АҚШнинг шимолий минтақаларида тобора кучлироқ сезилмоқда. Шунга қарамай, мутахассислар яқин кунлар ичида об-ҳаво шароити яхшиланиши, ҳаводаги зарарли моддалар миқдори камайишига умид қилмоқда. Агар ҳаво ифлосланиш даражаси инсон соғлиғи учун хавфли чегарага етса, ФИФА мусобақа ўтказиш тартибини ўзгартириш ёки кечиктириш бўйича махсус протоколларга эга. Ҳозирча эса финал санаси ёки вақти ўзгариши ҳақида расмий баёнот берилмаган.

Эслатиб ўтамиз, бугун, 17 июль куни бўлиб ўтиши керак бўлган МЛС доирасидаги «Чикаго Файр» — «Ванкувер Уайткэпс» учрашуви Чикаго шаҳрида ҳаво сифати ёмонлашгани сабабли кейинроқ муддатга кўчирилган эди. Ҳавонинг ифлосланиши Канададаги ўрмон ёнғинлари оқибатида юзага келган.