Филипе Луис «Монако» жамоаси бош мураббийи бўлди

«Монако» клуби жамоага бош мураббий этиб Филипе Луис тайинланганини маълум қилди. Бразилиялик мутахассис билан 2028 йил июнига қадар шартнома имзоланди.

40 ёшли мураббий Франция чемпионатидаги фаолиятини Бразилиянинг «Фламенго» клубидаги муваффақиятли иш давридан сўнг бошламоқда. Филипе Луис қўл остида «Фламенго» мамлакат Кубоги, Суперкубоги ва Бразилия чемпионлигини қўлга киритган, шунингдек, 2025 йилда Либертадорес Кубогида ғолиб чиққан.

Филипе Луис «Монако»га ўз мураббийлар штаби билан бирга етиб келди. Унинг жамоаси таркибига ёрдамчи мураббий Иван Паланко, жисмоний тайёргарлик бўйича мутахассис Диогу Линьяреш, шунингдек Антони Сантьяго ва дарвозабонлар мураббийи Юри Ниеминен киради. Ўтган мавсумда «Монако» Франция чемпионати жадвалида еттинчи ўринни эгаллаган эди.