Флик "Барселона" билан 2028 йилгача шартнома узайтиришга рози

"Барселона" ва унинг бош мураббийи Ханс-Дитер Флик ўртасида шартномани 2028 йилгача узайтириш бўйича оғзаки келишувга эришилди. Бу ҳақда "Mundo Deportivo" хабар бермоқда.

Манбага кўра, клуб мутахассисга шартномага яна бир йиллик опция — 2028/29 мавсумигача узайтириш бандини киритиш ниятида эканини ҳам маълум қилган. Ушбу банд маълум мақсадлар бажарилганда фаоллашиши мумкин.

Ҳозирги кунда немис мураббийининг амалдаги шартномаси 2027 йилгача мўлжалланган. Флик эса янги келишувни ҳозироқ имзолашни истамаяпти, чунки жамоа ҳозирда чемпионлик учун кураш олиб бормоқда.

У мавсум якунланишини кутишни афзал кўрмоқда, токи ҳеч ким уни "Барселона"нинг Ла Лигадаги устун ҳолатидан фойдаланяпти, деб ўйламасин. Айни пайтда каталонияликлар мусобақа жадвалида яқин таъқибчисидан 9 очко олдинда бормоқда.

Мураббий клуб раҳбарияти қарор қабул қилишда тўлиқ ишончга эга бўлишини истамоқда.