Флик машҳур юлдузнинг “Барса”га трансферини блоклади

Саудия Арабистонининг “Ал-Иттиҳод” жамоаси футболчиси Н'Голо Канте Франция терма жамоаси сафида Германиядаги “Евро-2024” чемпионатида юқори савияда ўйнаганидан кейин уни Европага қайтариш истагини билдирган жамоалар чиққан эди.

“Барселона” спорт директори Деку ҳам машҳур футболчини Каталонияга олиб келиш бўйича иш бошлаб юборган. Бироқ бу трансфер амалга ошмайдиган бўлди.

Mundo Deportivo нашрининг ёзишича, каталонияликларнинг янги бош мураббийи Ханс-Дитер Флик 33 ёшли ярим ҳимоячининг трансферини блоклади.

Германиялик мутахассис ўз қарорини жамоани шакллантиришда асосан ёшларга эътибор қаратиши билан изоҳлади.

Канте фаолияти давомида Францияда “Булонь” ва “Кан”, Англияда “Лестер Сити” ҳамда “Челси”  клубларида ўйнаган.