Фоден А Сериясидаги етакчи клубда фаолиятини давом эттириши мумкин

«Манчестер Сити»нинг ҳужумкор ярим ҳимоячиси Фил Фоден Италиянинг машҳур клуби «Милан» сафига ўтиши мумкин. Бу ҳақда SportMediaset нашри хабар бермоқда.

Манба маълумотига кўра, «Милан» 26 ёшли футболчини эҳтимолий трансфер сифатида кўриб чиқмоқда. Миланликлар унинг хизматларини қўлга киритиш учун аввал жамоа етакчиларидан бири Рафаэл Леауни сотиши керак бўлиши айтилмоқда.

Хабарда таъкидланишича, Фоденнинг номзоди бир вақтнинг ўзида бир нечта клубларга таклиф этилган. Сабаби — у «Манчестер Сити» билан тузган шартномасининг сўнгги йилига кирган ва бу ҳолат унинг трансферини анча реаллаштириб қўйган.

Ўтган мавсумда Фоден барча мусобақаларни ҳисобга олган ҳолда 50 та ўйинда майдонга тушди, 10 та гол урди ва 7 та голли пас берди.

Transfermarkt портали англиялик ярим ҳимоячининг бозор қийматини 70 миллион евро атрофида баҳоламоқда.