ФР: "Навбаҳор"га сиғмаган Марушичнинг ишлари қандай кетяпти?

Самвел Бабаян бошчилигида ўз олдига яна катта мақсадларни қўя бошлаган "Навбаҳор" 2022 йилга катта трансферлар билан кириб келди.

Улардан бири Грузия чемпионати тўпурари Зоран Марушичнинг жамоа таркибига келиб қўшилиши бўлди. "Навбаҳор" раҳбарияти ўзбек футболига етишмаётган кучли ҳужумчи муаммосини шу йўл билан ҳал қилишни ўйлаганди.

Бошқа ҳамкасблари билан солиштирсак, Зораннинг Ўзбекистондаги фаолияти ёмон кечмади: Суперлига доирасидаги 25 ўйинда 11 гол, 2 ассист. Сербиялик форвард киритган тўплари, голли узатмалари билан нақ 8 учрашувнинг якуний натижасига таъсир кўрсатди ва якунда кумуш медаллар қўлга киритилиши учун катта ҳисса қўшди.

Аммо чемпионликни мақсад қилган жамоада қолиш учун бу камлик қиларди (йил давомида 8 млн маошга ўйнаган Отабек Жўрақўзиев ҳам шунча гол урган эди). Шу туфайли "Навбаҳор" раҳбарияти Марушичга жавоб бериб, унинг ўрнини Суперлигадаги энг кучли маҳаллий ҳужумчилар (Темурхўжа Абдухолиқов ва Шоҳруз Норхонов) билан тўлдирди.

Зоран шундан кейин бошқа клубларимиздан таклиф кутди. Кўнглидагидек вариант чиқмагач, Тбилисига қайтишга мажбур бўлди.

Марушич яна Грузия чемпионатига мослашиб олиши учун 2та ўйин кифоя қилди. 3-турдан "Динамо"нинг асосий таркибида ўйнай бошлаган 29 ёшли футболчи айни пайтда нафақат тбилисиликлар, балки бутун чемпионатнинг асосий тўпурарига айланиб олди. Унинг ҳисобида 11 ўйинда урилган 7 гол, 2та ассист бор.

Марушич тўп тепаётган "Динамо" (Тбилиси) эса Грузия чемпионатида 2-поғонани эгаллаб турибди. Мусобақада пешақадамлик қилаётган батумиликлар билан орадаги фарқ 2 очкони ташкил қиляпти.

Фахриддин Рўзиев