Фьюри-Жошуа жангида кимнинг имконияти юқори? Ўзбекистонлик бокс олами вакиллари жавоб берди

Ҳозирги кунда профессионал бокс оламидаги энг шов-шувли воқеа оғир вазн тоифасидаги икки британиялик чемпион Тайсон Фьюри ҳамда Энтони Жошуа ўртасидаги жангнинг ташкил қилиниши бўлмоқда, десак янглишмаган бўламиз.

Ҳа, ушбу тўқнашувга август ойида Саудия Арабистонининг Ар-Риёд шаҳри мезбонлик қилиши кўзда тутилмоқда.

Шубҳасиз, бутунжаҳон бўйлаб ҳар иккисининг мухлислари кўплаб топилади. Қизиқиш юқори ва жанг шиддатли ўтиши турган гап. Ҳар иккиси замонамизнинг энг кучли оғир вазн тоифаси вакиллари ҳисобланади. Шунинг учун ҳам уларнинг жангидан аввал бирортасининг имкониятини юқори баҳолаш қийин.

Шундай бўлса-да, ўзбек бокс олами вакилларининг фикр ва мулоҳазаларига қизиқдик.

Зуфар Сулаймонов – мураббий

- Энг кўп кутилмаган натижалар оғир вазн тоифасида кузатилади. Чунки вазн оғир ва зарба кучи ҳам шунга яраша бўлади. Айниқса, Тайсон Фьюри ва Энтони Жошуадек боксчилар рингда тўқнаш келганда ҳар қандай вазият юз бериши мумкин. Иккиси ҳам юқори “класс”даги чармқўлқоп усталари саналади. Бекорга барча камарларни ўзлариники қилиб олишмаган. Шундай бўлса ҳам, бироз Тайсон Фьюрида имконият юқорироқдек назаримда... Чунки унда яхши техника, зарба бор ва шунга қўшимча равишда зарба ҳам кўтара олади. Жошуанинг Энди Руис билан бўлган биринчи жанги унда зарбани қабул қилиш, ҳис қилиш борасида бироз муаммо бордек таассурот уйғотди. Албатта, бу нисбий тушунча! Лекин бундай жангларда кичик элементар камчиликлар ҳам салбий оқибатларга олиб келиши мумкин.

Бобур Нажмиддинов – мураббий

- Бу жангда кимнинг имконияти юқори эканлигини айтиш жуда мушкул. Иккиси ҳам ажойиб спорт “форма”сида ва жанг қизиқарли ўтиши аниқ. Нисбатан Тайсон Фьюрида бу жангни ўз фойдасига ҳал қилиш имконияти юқори, деб биламан. Сабаби, унда вазнига нисбатан тезлик ва юқори техника мавжуд.

Фаррух Муҳиддинов – блогер

- Тайсон Фьюри жуда тезкор ва чидамли боксчи саналади. Бироқ Жошуанинг бир зарбаси жанг тақдирини ҳал қилиб қўйиши мумкин. Назаримда 7-9 раундлар оралиғида Энтони Жошуа ғалаба қозонади. Албатта, бу менинг шахсий фикрим!

Аброр Турсунпўлатов – мураббий

- Тайсон Фьюри Жошуани осонликча мағлуб этади, деган фикрдаман. Жошуа ҳам ажойиб атлет. Лекин Фьюри иккинчи жангда Деотей Уайлдерни шундай уриб ташладики, шахсан менда Жошуани ҳам мағлуб эта олишига ҳеч қандай шубҳа қолмади. Агар, Фьюри яхши “форма”да бўлса, уни яқин орада ҳеч ким мағлубиятга учрата олмайди, деб ўйлайман.

Баҳодир Жалолов – боксчи

- Бу борада бирор фикр билдиришни ўзи қийин. Бу оғир вазн тоифаси ва бунда битта зарба жанг тақдирини ҳал қилиб қўйиши мумкин. Техник жиҳатдан Фьюри устунроқ бўлса ҳам, Жошуанинг жисмоний ҳолати ажойиб даражада. Юқорида таъкидлаганимдек, битта зарба барчасига якун ясаши мумкин. Қисқа қилиб айтганда, барчаси рингда ҳал бўлади.

Қувонч Тайғонбоев – мураббий

- Тўғриси, жуда қийин масала! Иккиси ҳам ҳозирги кундаги энг кучли боксчилар ҳисобланади. Бироқ Фьюри ноодатий жангчи ва унда имконият юқори, деган фикрдаман.

Аълохон Абдуллаев – боксчи

- Бир-бирига жуда мос рақиблар. Улар ўртасидаги жанг анчадан бери кутилмоқда ва шунга яраша жуда қизиқ ўтиши аниқ. Мен бу тўқнашувда Жошуа ғалаба қозонса керак, деган фикрдаман. Албатта, бу шахсий фикрим.