Гаттузонинг "Наполи"даги ўрнини ким эгаллаши маълум бўлди

Италиялик журналист-инсайдер Фабрицио Романонинг маълум қилишича, Лучано Спаллетти тез орада "Наполи" бошқарувини ўз қўлига олади.

Юқоридаги манбага кўра, 62 ёшли мутахассис неаполликлар билан 2023 йилга қадар шартнома имзолайди. Спаллетти бу борада Женнаро Гаттузонинг ўрнини эгаллайди. Ўз навбатида Гаттузо "Фиорентина"га йўл олади.

Спаллеттининг сўнгги иш жойи Миланнинг "Интер" клуби бўлган. У “нерадзуррилар” сафидан 2019 йилнинг майида истеъфога чиқарилган. Тажрибали мутахассис мураббийлик фаолияти давомида "Эмполи", "Сампдория", "Удинезе", "Зенит" ва "Рома" клубларини бошқарган.

"Наполи" ўтган мавсум А Серияда 5-ўринни эгаллади ва Европа лигаси гуруҳ босқичида иштирок этиш ҳуқуқини қўлга киритди.