Генри Сехудо UFC даги энг машҳур ва тажрибали реферини кескин танқид қилди

Икки карра UFC собиқ чемпиони Генри Сехудо ММА оламидаги энг машҳур ва тажрибали реферилардан бири Херб Динга нисбатан кескин танқидлар билан чиқди.

Америкалик спортчи ҳакамнинг малакаси ва қарорларини шубҳа остига олди ҳамда Невада штати Атлетика комиссиясини (NSAC) Динни номаълум муддатга жанглардан четлатишга чақирди.

"Ўтган ҳафта DWCS турнирида бир йигит бошига қўрқинчли, қоидага зид зарба қабул қилди. Херб Диннинг эса жангни ўз вақтида тўхтатишга юраги етмади! У дарҳол аралашиши керак эди. Шунда ушбу баҳс "No-Contest" деб топилар, ўша ММАчи эса ноқонуний ғалаба билан октагонни тарк этмасди.

Ҳакамлар корпусы ёпиқ ва дахлсиз тузилмага айланиб бораётгани хавотирли ҳолат. Ҳозирги муаммонинг энг тўғри ечими — Херб Динни вақтинча жанглардан четлатиш!", — дея таъкидлади Сехудо "MMA Fighting" нашрига берган интервьюсида.