Гвардиола “Барса” юлдузини 100 миллион еврога оладиган бўлди

“Манчестер Сити” ёзги трансферлар даврида таркибда катта ўзгаришларни амалга оширишни давом эттиради. “Шаҳарликлар” ёши ўтган ўйинчилар ўрнига ёш ва истеъдодли янги ижрочиларни олиб келади.

El Nacional нашрининг маълум қилишича,  Хосеп Гвардиола ўзининг собиқ жамоаси “Барселона”дан 22 ёшли ярим ҳимоячи Педрини олишни мўлжаллаяпти.

Испаниялик мутахассис ўз ҳамюртини жамоа билан шартномаси якунланаётган Кевин де Брюйнедан бўшайдиган позицияга олиб келмоқчи.

Манбага кўра, манчестерликлар бу трансфер учун 100 миллион евролик таклиф тайёрлаяпти. Бироқ “Барселона” хўжайини Жоан Лапорта Педрининг Англияга кетишига тўсқинлик қилиши мумкинлиги айтилмоқда.

Педри яқинда клуб билан шартномасини 2030 йилнинг ярмигача узайтирган ва унга 1 миллиард евро бадал пули белгиланган.

Шунга қарамай, Жоан Лапорта Педри фақатгина ўзи кетишни ихтиёр қилган тақдирдагина уни қўйиб юборишини айтган. Демак, “шаҳарликлар” бу трансферни амалга ошириш учун энг аввал Педри билан келишиб олиши шарт.