Гвардиола Кевин де Брюйне рақиб жамоага ўтишига муносабат билдирди

“Манчестер Сити”нинг охирги ўн йилдаги муваффақиятларида катта роль ўйнаган Кевин де Брюйне мавсум якуланиши билан клубни тарк этади.

Келаси ой 34 ёшни қарши оладиган бельгиялик плеймейкерга қатор лигаларда жиддий таклифлар бўлмоқда. Кевинни ўз сафига қўшиб олишга уринаётганлар орасида Англия Премьер-лигасининг “Арсенал”, “Ливерпуль”, “Вест Хэм”, “Астон Вилла” каби клублари ҳам бор.

“Шаҳарликлар” бош мураббийи Хосеп Гвардиода шогирдининг рақиб жамоаларга ўтиши мумкинлиги ҳақидаги хабарларга изоҳ берди.

-  Бу ҳақда ҳеч қандай маълумотим йўқ. Нима бўлган тақдирда ҳам Кевиннинг ўзига ва оиласида барча яхши тилакларимни билдириб қоламан. Ҳа, энг яхши тилакларимни, - деди Хосеп Гвардиола.

Кевин де Брюйне “Манчестер Сити”га 2015 йили – Хосеп Гвардиоладан бир йил муқаддам келган. Ҳозиргача бу ўйинчи “шаҳарликлар” жамоасида 418 та учрашув ўтказиб, ўз ҳисобига 108 та гол ва 177 та ассист ёздириб қўйган.