Гвардиола марказий ҳимоячини сотиб юборади

“Манчестер Сити” 30 ёшли швейцариялик марказий ҳимоячи Мануэль Аканжини сотиб юборишга қарор қилган. Нуфузли манба –  esteemedkompany.com портали эксперт Адам Марреттнинг таъкидлашича, клубнинг бу қарори Хосеп Гвардиола Аканжининг ўрнига янги мавсумда Абдуқодир Ҳусановни кўпроқ ўйнатишни мақсад қилгани билан боғлиқ.

“Шаҳарликлар” яқинда “Галатасарой”нинг Аканжи бўйича 15 миллион фунт стерлинг бадал суммаси кўрсатилган таклифини қабул қилганди. Бироқ Мануэлнинг ўзи Туркия Суперлигасига кўчиб ўтиш вариантини маъқулламай турибди.

Шу воқеадан кейин Аканжи олдида янги лойиҳаларга йўл очилди. Таниқли инсайдер Фабрицио Романонинг таъкидлашича, швейцариялик ҳимоячига Италиядан “Милан”, Германиядан “Байер” ва Англиянинг ўзидан “Кристал Пэлас” ҳамкорлик шартномасини беришга тайёр.

Айни пайтда Аканжи кейинги фаолиятини қаерда давом эттириш ҳақида бош қотиряпти. Унинг “Манчестер Сити” билан амалдаги шартномаси яна икки йил давом этади.