Гвардиола шогирдининг ҳолати ҳақида гапирди

"Манчестер Сити" бош мураббийи Хосеп Гвардиола Эрлинг Холанднинг биринчи бўлимдан кейин алмаштирилганига изоҳ берди.

"Манчестер Сити" ҳужумчиси Эрлинг Холанд АПЛнинг 26-туридан ўрин олган "Фулхэм"га қарши баҳснинг биринчи бўлимидан сўнг захирага олинди. Норвегиялик футболчи 39-дақиқада гол уриб, таблодаги ҳисобни 3:0 кўринишига келтирган эди. Танаффусдан сўнг унинг ўрнига Омар Мармуш ўйинни давом эттирди. Ушбу ҳолатга "шаҳарликлар" устози қуйидагича изоҳ берди;

"Ўша вақтда ҳали шифокорлар билан гаплашганим йўқ эди. Эрлингга нима бўлганини аниқ билмайман. Ҳолсизлик, чарчоқ ва шунга ўхшаш нимадир бор эди. У менга ўзини ноқулай ҳис қилаётганини айтди. Кейин унда ўйинлар сони кўплигини, ҳисоб 3:0 эканини захирада Мармуш ўтирганини ҳисобга олиб уни майдондан олишга қарор қилдим", - деди испаниялик мутахассис.

Маълумот учун, "Манчестер Сити" шанба куни Англия кубоги доирасида "Сольфорд Сити"га қарши майдонга тушади.