Ҳамиджон Актамов "Қизилқум"ни даҳшатли ўйин кутаётганини, "Пахтакор" билан "Насаф" эса ютиши аниқ эканини айтди. Сабаби...

Суперлиганинг 16-тур баҳслари 16 август куни бошланади. Кураш жуда қизғин палласига кирган бўлиб, интриганинг ҳарорати худди ёзнинг ҳарорати каби ортиб бормоқда.

Фақат бу сафар доимгидек 7 та эмас, балки 6 та жуфтлик беллашади. “Сўғдиёна” – “Нефтчи” учрашуви 13 сентябрга қолдирилган. Бунга сабаб шуки, жиззахликлар 17 август куни ОФК Кубоги доирасида Тожикистонда “Хўжанд”га қарши муҳим ўйинни ўтказади. Шунинг эвазига Суперлигамизнинг навбатдаги турида 6 та ўйин гувоҳи бўламиз. Бу сафар барчамиз учун кўзга кўринган мутахассислардан бири Ҳамиджон Актамов кимда қандай имконият борлиги ҳақида гапирди.

16 август (сешанба)

“Қўқон-1912” – “Навбаҳор”

- Менимча, “Қўқон-1912” – “Навбаҳор” ўйинида наманганликлар ютса керак. Чунки “Навбаҳор” ҳозир жуда яхши кафиятда ва турнир жадвалида пешқадам бўлиб турибди. Ҳар томонлама, футболчиларнинг кайфияти зўр. Омад ҳам улар томонида. Назаримда, 40х60 “Навбаҳор” фойдасига. Меҳмонлар ютса керак. Албатта, “Қўқон-1912” ўз уйида ўйнайди ва у ерда ҳам яхши жамоа йиғилган. Майдон эгаларини тайёргарлиги яхши. “Навбаҳор”га осон бўлмайди. Бу – футбол!

“Локомотив” – “Бунёдкор”

- “Локомотив”ни ҳам, “Бунёдкор” клубини ҳам охирги ўйинларини кузатиб боряпман. Ростини айтсам, кўпроқ “Локомотив” жамоаси рақибига нисбатан жонлироқ туюлди, менга. Яна билмадим.

17 август (чоршанба)

“Пахтакор” – “Олимпик”

- “Пахтакор” ютади, бу аниқ. Биринчи даврада дуранг бўлган бўлса, бу сафар “Пахтакор” ғалабага эришади. Иккала жамоани ўйинларини кўрдим. “Пахтакор” анча ўзига келиб қолган.

Насаф” – АГМК

- “Насаф” клуби ғалаба қозонади. Меҳмонларни имконияти пастроқ. Нега деганда, охирги пайтларда АГМК жамоасида барқарорлик йўқ. “Насаф”да ҳам шундай бўлганди, аммо улар ўзини ўнглаб олди. Шунинг учун назаримда қаршиликлар ўз майдонида ютади. Мухлислари олдида ўйнайди, мезбонларда имконият кўпроқ.

18 август (пайшанба)

“Сурхон” – “Металлург”

- Бу тўқнашувда менимча дуранг бўлса керак. Сабаби, иккала жамоа ҳам яхши. Ғалаба учун курашади. Аммо учрашув Тошкентда бўлади. Балки шунинг эвазига “Металлург”да имконият бироз кўпроқ бўлиши табиий.

“Қизилқум” – “Динамо”

- Бу иккала жамоа менга жуда таниш. Ҳар иккиси яхши шаклланган. Бунинг устига “Динамо” таркибини кучайтириб олди. Имкониятлар 50х50. Бу жуфтликда бир нима дея олмайман. “Динамо” сафарда ўйнайди. “Қизилқум” эса ўз уйида тўп суриши эвазига уларда озгина устунлик бор. “Динамо” жон сақлаб қолиш учун курашяпти ва шунга яраша ўйин кўрсатади. Иккинчи даврада таркибида ўзгаришлар бўлган. Бош мураббий ҳам ўзгарди. Энг чиройли, шиддатли ва даҳшатли ўйин бўлади. Кўрамиз, олдиндан кимнидир ютади, деб аниқ айта олмайман.