Ҳақимни беринглар! Агуэро “Барса”ни судга берди

“Барселона”нинг собиқ ҳужумчиси Серхио Агуэро Каталония клубини судга бериб, бир неча йил аввал “Барса” қарз бўлиб қолган 3 миллион евро миқдоридаги маошини талаб қилмоқда.

Эсингизда бўлса, аргентиналик юлдуз 2021 йилнинг ёзида “Барселона” сафига қўшилганди. Бироқ декабрда профессионал фаолиятини тугатишга мажбур бўлганди. Бунга унинг юрагида нуқсон борлиги сабаб бўлган.

Касаллик туфайли Агуэро шартномани охиригача етказа олмади. “Барселона” мутасаддилари унга шартномада кўрсатилган биринчи йилги маош суғурта компанияси томонидан тўланишини маълум қилди.  Бироқ суғурта компанияси Агуэронинг юрагидаги нуқсон болалигидан бўлганини таъкидлаб, унга пул тўланмаслигини билдирди.

Агуэронинг ўзи эса, “Барселона” унга 3 миллион евро миқдоридаги маошни тўлашга мажбур деб ҳисобламоқда.

Серхио Каталонияга келганидан кейин клуб учун бешта ўйинда майдонга тушиб, ўз ҳисобига битта гол ёздириб қўйган.