Ҳарри Кейнда Роналду ва Холанд номини тарихдан ўчириш учун биттагина ўйин бор

“Бавария”да самарали ўйин кўрсатаётган англиялик форвард Ҳарри Кейн Европанинг “топ-5” лигаларида мутлақ рекорд ўрнатиш имкониятига эга бўлди.

Бундеслиганинг тўртинчи турида “Хоффенхайм” дарвозасини уч маротаба ишғол қилган ҳужумчи, мюнхенликлар таркибидаги голлари сонини 98 тага етказиб олди. Ҳарри Кейн бу кўрсаткичга эришиши учун 103 та учрашув кифоя қилди.

“Топ-5” лигаларида гол уриш бўйича юзлик маррани энг тез забт этган футболчилар Криштиану Роналду ва Эрлинг Холанд ҳисобланади. Ҳар иккиси топ-лигаларда дастлабки 100 та голини уриш учун 105 тадан учрашувда майдонга тушишига тўғри келган.

Бу маррага етиш учун Кейнга иккита гол керак бўлади. Бунинг учун моҳир форвард 29 сентябь куни “Вердер” билан бўладиган баҳсда иккита гол уриши талаб этилади.