Икром Алибоевнинг жароҳати жиддий, у ўз ҳисобидан Германияга кетди

Ўзбекистон миллий терма жамоаси аъзоси, Жанубий Кореянинг “Сеул” клуби шарафини ҳимоя қилиб келаётган Икром Алибоев анчадан бери безовта қилиб келаётган жароҳатини даволатиш учун Германияга кетгани маълум бўлди.

Бу хусусида миллий терма жамоамиз шифокори Аброр Пирриев ўзининг телеграмдаги каналида шундай деб ёзди:

- Яна бир футболчимиз – Икром Алибоев жарроҳлик столига ётадиган бўлди. Уни анчадан бери безовта қилиб, жамоасида муқим ўйнашига бермаётган чов соҳасидаги оғриққа сабаб бўлаётган омилни бартараф этишнинг сўнгги чораси операция бўлиб қолди. Бундай пайтда операцияни қаерда ва кимга қилдириш ҳақида профессионал футболчи минг ўлчаб бир кесади. Икром ҳам шундай қилди ва у кеча Германияга учиб кетди.

МТЖ аъзосининг жарроҳлик столига ётишидан ташқари кўнглимни хира қилаётган яна бир жиҳат: у барча харажатларни ўз чўнтагидан сарфламоқда: операция, авиачипта ва ҳоказо. Мен юрист эмасман ва Икромнинг контракти билан ҳам таниш эмасман, аммо қандай вазият бўлмасин у тўп сураётган жамоа ҳамюртимизнинг айнан ўйин ва машғулотлар маҳали орттирган тиббий муаммосини ҳал этишда жавобгар эканлиги аниқ (куни кеча футболчилар уюшмаси раиси Камол Мурзоев билан ҳам шу масалада фикр алмашдик).

Бу борада масалага ойдинлик киритилар, асосийси, ҳамюртимиз жарроҳлик муолажасини муваффақиятли ўтказиб олса бу́лгани...