Илҳом Алижонов: "Мураббийга айтган ваъдамни бажардим"

“Андижон”нинг “Навбаҳор”га қарши учрашувида жамоамизнинг ҳисобни тенглаштирувчи голи муаллифига айланган ҳимоячи Илҳом Алижонов ҳам табиийки, қимматли ғалабанинг қўлга киритилишида катта ҳиссасини қўшди.

Шу боис “Андижон” матбуот хизмати футболчидан интервью олди.

- Водий дербиси қийин ўтиши аниқ эди ва шундай ҳам бўлди. “Андижон” 0:1 дан кейин иродасини намойиш қилиб, якунда 2 та гол урди ва ғалабани илиб кетди. Бундай беллашувдан кейин таассуротларингиз қандай?

- Авваламбор, бу ғалабамиз билан барча Андижон халқини табриклайман. Дерби ҳар доимгидек ўз номи билан дерби бўлиб келган. Осон учрашув бўлмаслиги аниқ эди. Ўзимиздан ва Намангандан кўплаб мухлислар келишини билардик. Ўйин темпи ҳам юқори бўлишини кутгандик ва шунга яраша тайёргарлик кўрганмиз. Аммо ўзимиз кутмаган даражада эрта гол ўтказиб юбордик. Шунга қарамай, биз бу нарсага ҳам руҳан тайёр эдик. Охиригача курашдик, керакли голларимизни уриб ғалаба қозонган ҳолда ишқибозларимизни қувонтирдик. Ўйлайманки, ўйин бўйича ғалабага лойиқ эдик. Яхши ҳаракат қилдик.

- Илгари “Навбаҳор”да тўп сургансиз. Собиқ жамоангизга гол уриш икки ҳисса ёқимли бўлса керак-а? Ўша голингизга қандай таъриф берган бўлардингиз?

- Голимга келсак, учрашувдан бир ҳафтача олдин бош мураббийимиз билан бирга-бир суҳбатлашганимизда “Навбаҳор”га гол ураман деб айтгандим. Биринчи ўринда айтган ваъдамни бажардим. Биринчи таймда ҳам гол уришим учун бир-иккита вазиятлар бўлди. Иккинчи бўлимда гол урдим, бундан жуда хурсандман. Ўтган йили “Андижон” сафида про лига ғолибига айландик. Бу йил Суперлигада ҳам муносиб иштирок этяпмиз. Дебютимни “Навбаҳор”да бошлаганман. Наманганлик мухлисларни хафа қилмоқчи эмасман, аммо андижонлик ишқибозларни хурсанд қила олганимиздан бошим осмонга етди.

- Ҳимоячи бўлишингизга қарамай, учинчи голингизни урдингиз. Эътиборлиси, учаласини ҳам бош билан урдингиз ва сиз гол урган барча учрашувларда “Андижон” ғалаба қозоняпти...

- Ҳа, бу ҳақида ўзим ҳам ўйладим. Гол урганимдан сўнг захирага олиндим. Ўша пайтда “Турон” билан ўйиндаги каби яна ғалабани илиб кетсак эди, дея ўйлаб тургандим. Суҳроб Бердиев дарвозани ишғол қилганидан кейин қувончим чексиз даражада бўлди. Ўша ҳолатимизни тасвирлаб беришим қийин. Ўзим ҳам ушбу статистикани ҳатто ўйин пайтида ҳаёлимдан ўтказгандим. Гол уриб ҳисобни тенглаштирганимдан сўнг гол уриб ютиб кетишимиз ҳақида ўйлаб тургандим.

- Учрашувдан кейин ғалаба билан сизни биринчи бўлиб ким табриклади?

- Администраторимиз Хурсандбек Қосимов билан қувончимизни бўлишдик. Ўйиндан кейин яқинларимиз, акаларимиз, дўстларимиз бор, улар ҳам стадионга келишганди. Ўшалар билан ҳам ғалабани бирга нишонладик.

- Стадиондаги муҳитга қандай таъриф берасиз?

- Ўйин бошлангунича ҳар бир футболчининг ичида қандайдир ҳаяжон бўлади. Учрашув бошланганидан кейин мухлисларнинг бақир-чақирлари бизга мотивация беради. Стадионда ишқибозларимизнинг учрашув охиригача жамоамизни қўллаб-қувватлаб тургани биз футболчиларни руҳлантириб турди.

- Бу ғалабани кимга бағишладингиз?

- Ҳар доим ўйиндан олдин дуо қилиб турадиган ота-онам ва оиламга бағишладим. Барча мухлисларимизга катта раҳмат. Улар Ўзбекистонда мухлислик қилиш бўйича биринчи ўринда туришади.

“Андижон” матбуот хизмати.