Илия Топурия ва Ислом Махачев қачон жанг қилади? Дана Уайт бу саволга жавоб берди

Аввалроқ, Испания телеканаллари Илия Топуриянинг навбатдаги рақиби Ислом Махачев ёки Чарльз Оливейра бўлишини айтиб ўтганди.

UFC президенти Дана Уайт эса "UFC 315" турнири олдидан ўтказилган матбуот анжуманида Белал Муҳаммаднинг Жек Делла Маддалена билан жанг натижаси Топуриянинг навбатдаги рақибини аниқлашда муҳим рол ўйнашини таъкидлади.

Яъни Махачев ва Белалнинг бир-бирига нисбатан илиқ муносабати улар ўртасидаги потенциал жанг эҳтимолини камайтиради. Агар Делла Маддалена Белални мағлуб эта олса, ҳозирда енгил вазн тоифасида чемпион бўлиб турган Ислом унга қарши курашиш учун ярим ўрта вазнга кўтарилиши мумкин. Бундай сценарий Оливейрани Илия учун рақиб сифатида қолдиради.

Агар Муҳаммад ўз унвонини сақлаб қолса, Махачев ва Топурия ўртасидаги жангни ташкил қилиш имконияти ортади.