Илёс Зейтуллаев: "Идеал жамоанинг ўзи йўқ!"

Суперлиганинг 4-туридан ўрин олган «Бухоро» - «Бунёдкор» (0:2) учрашувидан сўнг ғолиб жамоа устози Илёс Зейтуллаев фикрлари билан ўртоқлашди.

"Бугун мавсумдаги энг қийин ўйинларимиздан бирини ўтказдик. Айниқса биринчи бўлимда. Танаффусда йигитлар билан барчасини гаплашиб олдик ва натижада иккинчи бўлимда вазиятни ўнглай олдик. Ўйинни ютолмасанг, мағлуб ҳам бўлма дейишади. "Бухоро" бугунги баҳсга жуда яхши тайёргарлик кўрганини исботлай олди.

Бугун Темурхўжа ва Итсукининг йўқлиги сезилди. Улар жароҳат олган, шунинг учун таваккал қилишни истамадик. Нажмиддин Нормуродов эса бугун жамоага жуда катта ёрдам берди. Уни қайси позицияга қўймайлик жангчи сифатида жамоага ёрдамга келади. 

Ғалабалар кўплигида муаммолар кўринмай қолади. Биз бу жиҳат устида ишлашимиз керак. Биринчи бўлимни ёмон ўтказдик ва муаммоларимиз кўринди. Биз ишлашда давом этишимиз лозим. Идеал жамоанинг ўзи йўқ!".