"Интер Майами" Европадан яна юлдузга кўз тикди

«Наполи» ярим ҳимоячиси Кевин де Брёйне яқин вақтлар ичида ўз фаолиятини АҚШ чемпионатида давом эттириши мумкин. 35 ёшли бельгиялик футболчига жиддий даъвогар сифатида «Интер Майами» клуби тилга олинмоқда.

Маълумотларга кўра, америкаликлар бир жамоада юлдузлардан иборат таркиб тўплашни мақсад қилган. Ҳозирнинг ўзида клуб сафида Лионель Месси, Луис Суарес ва Родриго де Пауль каби номдор футболчилар тўп сураяпти. Энди эса навбатдаги катта трансфер сифатида де Брёйне номзоди кўриб чиқилмоқда.

Тажрибали ярим ҳимоячига «Сан-Диего» ва «Чикаго Файр» жамоалари ҳам қизиқиш билдиргани айтилмоқда. 

Шунга қарамай, футболчини ўз сафига қўшиб олиш борасида асосий даъвогар сифатида айнан «Интер Майами» кўрилмоқда. Ўтган мавсумда де Брёйне «Наполи» таркибида Италия чемпионатида 18 ўйин ўтказиб, 5 та гол урди ва 2 та голли пас муаллифига айланди.