Исакка Ла Лиганинг гранд клубидан харидор чиқди

"Барселона" Левандовскига ўринбосар сифатида Александр Исакни олиб келмоқчи.

Хабарингиз бор, "Барса" қишки трансферлар ойнасида ҳеч қайси футболчи билан шартнома имзоламади. Бироқ, клуб мутассадилари ёзда янги футболчиларни жамоага олиб келмоқчи. Хусусан, каталонияликлар  раҳбарияти "Ньюкасл Юнайтед" ҳужумчиси Александр Исак билан шартнома имзолашни ўз олдига мақсад қилган. Бу ҳақда "El Cheringito" нашри маълум қилди.  

Унга кўра, бош мураббий Флик айни пайтда жамоанинг асосий ҳужумчиси ҳисобланган Левандовскига айнан Исакни ўринбосар сифатида кўрмоқда. "Кўк-анорранглилар" Александрни қўлга киритиш учун Европанинг бир қатор гранд клублари билан курашишига тўғри келади. Аввалроқ швециялик ҳужумчига "Арсенал" ҳам қизиқаётганлиги ҳақида хабарлар тарқалган эди. 

Маълумот учун, 25 ёшли футболчи жорий мавсумда АПЛда 22 та ўйинда майдонга тушиб, 17 та гол ва 5 та голли узатмани амалга оширган. Унинг клуб билан амалдаги шартномаси 2028 йилнинг ёзигача мўлжалланган бўлиб, Transfermarkt  порталидаги нархи 75 миллион евро деб баҳоланмоқда.