Ислом Аҳмедов чемпион жамоа устозига айланди ва ОФК Кубогини ғалаба билан бошлади

Ўзбекистонлик тажрибали мутахассислардан бири, ФИФА ва ОФК инструктори сифатида фаолият олиб борган тажрибали Ислом Аҳмедов Қирғизистон чемпионатида иш бошлади.

Аниқроғи, Қирғизистон чемпионатининг амалдаги чемпиони “Абдиш Ата” жамоаси бош мураббийи этиб тайинланди. Айтиш жоизки, бу Аҳмедовнинг ушбу клубдаги илк иш фаолияти эмас. 2011 ва 2012 йилларда ҳам икки марта “Абдиш Ата” жамоасига устозлик қилган ва бу унинг у ерга учинчи қайтиши ҳисобланади.

“Абдиш Ата” Қирғизистоннинг етакчи жамоаларидан бири. Эътиборлиси, ўтган йили илк бор чемпионликка эришди. Унгача 7 бор кумуш ва 5 марта бронза медал эгасига айланган. Яна 5 маротаба Қирғизистон Кубоги соҳиби ва 2 марта финалчиси бўлган. Шунингдек, Қирғизистон Суперкубогида бир бор зафар қучган ҳамда 2 марта унинг финалида иштирок этган.

Айни пайтда “Абдиш Ата” мусобақа жадвалида 20 та ўйиндан сўнг 38 очко жамғариб 3-ўринни банд этиб турибди. Пешқадам “Алай”дан фақат 2 очкога ортда холос.

Ушбу жамоа раҳбарияти ҳамюртимиз Ислом Аҳмедовни бош мураббийликка тайинлаганликлари бежиз эмас. Боиси, “Абдиш Ата” ОФК Кубоги гуруҳ босқичидаги иштирокини бошлади. Аҳмедов эса 18 сентябрь куни бош мураббийга айланди ва 21 сентябрь куни гуруҳ босқичи доирасидаги илк турни ўз майдонида Туркманистоннинг “Олтин Аср” жамоасига қарши ўтказиб, 3:0 ҳисобидаги йирик ғалабани қўлга киритишди. Дарвоқе, Ислом Аҳмедов жамоаси “Е” гуруҳидан жой олган бўлиб, у ерда шунингдек, Тожикистоннинг “Равшан” ҳамда Туркманистонниинг яна бир жамоаси – “Мерв” ҳам бор.

Ислом Аҳмедов “Абдиш Ата”даги дебютини ОФК Кубогида муҳим баҳс орқали бошлаб, унда ғалаба қозонгач, ўз фикрларини қуйидагича изҳор қилди:

“Кеча мен бу ўйинга алоҳида тайёргарлик кўраётганимиз ҳақида айтиб ўтгандим. Яхшигина селекция ишларини олиб бордик. Менинг қарашим бўйича Қирғизистоннинг яхши футболчилари олиб келинди. Барчаси режамиз бўйича кетди. Шунингдек, ҳаётда форс-мажор ҳолатлари бўлишини таъкидлаб ўтгандим. Ҳар доим ҳаётда бир хил ва текис кетмайди, унда чуқурликлар ҳам бўлади. Биринчи кунимданоқ йигитларга яхши футболчилар билан ишлаш ҳар бир мураббийнинг орзуси бўлишини айтгандим. Бугун барчамиз кўрдикки, “Олтин Аср” яхши жамоа экан. Ташкилий ва жамоавий ўйин бўйича яхши шаклланганига гувоҳ бўлдик”, - дейди ўзбекистонлик мутахассис.

Муҳими, ҳаюртимиз янги клубидаги дебютини ғалаба билан бошлаб олди. Энди ОФК Кубогидаги 2-тур учрашувини қирғизистонликлар 5 октябрь куни Туркманистонда “Мерв”га қарши ўтказадилар. Ҳамюртимизнинг олдига қўйилган биринчи вазифа албатта жамоани кейинги босқичга олиб чиқиш. Лекин бундан ташқари ҳам Ислом Аҳмедовни олдида турган муҳим вазифалар бор. Жумладан, у асосий жамоадан ташқари, ўринбосарлар ва клуб академиясини ҳам назорат қилган ҳолда ўз тажрибаси билан клубни ҳар томонлама ривожланиш стратегиясини ишлаб чиқади ва бу борада унга барча масъулият юклатилган. Табиийки, бунда Қирғизистон чемпионатидаги иштироки ҳам инобатга олинган.

Шуҳратбек Жўраев.