Ислом Аҳмедов жамоаси ОФК Кубоги гуруҳ босқичини муваффақиятли тугатди ва ҳамюртимиз энг яхши мураббийликка даъвогар

Ҳамюртимиз Ислом Аҳмедов бош мураббийлик қилаётган “Абдиш-Ата” клуби ОФК Кубоги “Е” гуруҳидаги сўнгги турда Туркманистоннинг “Мерв” клубини қабул қилди. Голларга бой ўтган учрашувда Аҳмедов жамоаси йирик 8:3 ҳисобида ғалаба қозонди. Ҳа, бундай натижа футболда камдан-кам кузатилади.

“Абдиш-Ата” ўз гуруҳида 6 та ўйинда 5 ғалаба, 1 дуранг қайд этиб 16 очко жамғарди ва кейинги босқич масаласини ҳал қилди.

Ўйиндан кейин Ислом Аҳмедов ўзининг инстаграм саҳифасида шундай ёзди:

“Кеча ОФК Кубогининг гуруҳ босқичи якунланди. Бизнинг жамоа 16 очко билан гуруҳда 1-ўринни олди ва мусобақадаги Кубок учун курашни давом эттиради. Клуб раҳбариятига бизни қўллаб-қувватлаётганлиги учун раҳмат.

Мураббийлар штабига ҳам миннатдорчилик билдираман. Профессионал тарздаги ҳамкорлик учун ташаккур. Шунингдек, футболчиларимизга спортча характер кўрсатганлигига таъзим билдираман. Бу омад йўлида профессионализм ва кўрсатган маҳорати учун миннатдорман”, - дейди Аҳмедов.

Шуни ҳам қўшимча қилиш керакки, Ислом Аҳмедов “KFU FOOTBALL AWARDS 2023”да Қирғизистоннинг энг яхши мураббийи бўлиш учун учта номзоддан бири бўлиб турибди. Унинг бошчилигида “Абдиш-Ата” мамлакат чемпионлигини қўлга киритди. Кўриб турганингиздек, ОФК Кубогида мағлубиятсиз равишда муваффақиятли иштирок этмоқда.