Исми Алвешга ўзгартирилган ўзбекистонлик футболчи ҳақида эшитганмисиз? У Европага тараддуд кўрмоқда

Футбол миллионлар ўйини, деган гапни кўп эшитгансиз. Бу бежиз эмас, албатта. Ҳар бир миллатда унинг ўзига яраша ихлосмандлари бисёр, шу жумладан бизда ҳам. Масалан, алоҳида бир ўйинчига мухлислик қилганча, унинг фанатига айланганлар алоҳида мавзу. Айниқса, Роналду ва Месси мухлислари!

Юртимизда ҳам жаҳон юлдузларига алоҳида ишқибозлик қилиш анча оммалашган. Ҳаттоки, шундай даражага етиб боришганки, ўз фарзандига қайсидир ёқтирган ўйинчисининг исмини ҳам қўйишган. Бугун айнан шу мавзуда сўз юритамиз.

Менимча, сарлавҳани кўриб бунга қизиққан бўлсангиз керак-а? Бизнинг чемпионатда Марадона исмли футболчи борлигини биласиз-а, ўтган йили sports.uz сайти учун Марадона Сафаров билан суҳбат уюштиргандик. Чемпионатимизда Марадонадан ташқари яна бошқа бир таниқли футболчининг исми қўйилган ўйинчи ҳам бор. Бу Алвеш! Фамилияси Муродуллаев. У 1998 йили Муборак туманида туғилган. Футболга меҳр қўйгани сабабли шу спорт турини танлаган ва ҳозирда Ўзбекистон чемпионатида фаолият олиб боряпти. Ярим ҳимоячи сифатида тўп суради. Алвеш sports.uz мухбирига аввало бу исмнинг қўйилиш тарихи ҳақида гапирди.

- Авваламбор, эътибор учун раҳмат айтмоқчиман. Исмим масаласига келадиган бўлсам, аслида менга Алишер, деб исм қўйишган. “Машъал” академиясида ўқиб юрган пайтимда, дадам кутилмаганда, исмимни Алвешга ўзгартирган. Дадам футболни ашаддий ишқибози, ҳаттоки мендан кўра, кўпроқ қизиқади. Аммо ўшанда нима сабабдан исмимни Алвеш, деб ўзгартирганини билмайман. Балки бу менга футболчи сифатида мотивация бериш учун қилингандир. У пайтда 16 ёшда эдим. Паспорт олганимда ҳам Алвеш, деб ёзилган.

алвеш2

Футбол оламида Алвеш номи билан тўп сурадиганлар кўп, улардан энг таниқлилари сифатида Дани Алвеш, Бруну Алвеш кабиларни айтиш мумкин. Бизнингча, ўзимизнинг Алвешга улардан бирининг ўйини ёққанлиги сабабли шундай ном берилган, деб ўйладик. Бу хусусида Муродуллаев шундай деди:

- Айнан қайсидир ўйинчига қиёсланмаган. Ҳаммаси тўсатдан юз берган. У пайтда Дани Алвеш ҳали танилмаганди. Бруну Алвеш эса таниқли ўйинчилардан бири эди. Дадам, асосан, Португалия билан Испанияга мухлислик қилиб юрарди. Балки Бруну Алвеш ёдига тушгандир. Лекин ўзим унга унчалик қизиқмаганман. Менимча, аслида Бруну Алвешга ҳам ҳавас қилиб қўйилмаган бўлса керак. Мени руҳлантириш учун шу исмни ўйлаб топган, назаримда. Ўзимга Одил Аҳмедов, Азиз Ҳайдаров ва Фабрегаснинг ўйинлари ёқарди.

Катта эҳтимол билан юртимиздаги Алвеш исмли ягона инсон шу бўлса керак. Бу номни илк бор эшитганлар учун ўнғайсиз туюлиши аниқ. Қизиқ, футболчи ўз номи билан ноқулай аҳволга ҳам тушиб қолганми?

- Исмим билан боғлиқ ноқулай ҳолат бўлган. Академияда ўқиб юрганимизда ўсмирлар терма жамоасига чақиришган. У пайтда Темур ака Олимхўжаев бош мураббий эди. Ёш бола эдим. Исмимни сўраганида, Алвеш дегани уялгандим, менга бироз ноқулай туюлган. Кейинчалик мослашиб кетдим. Исмим алмашганидан кейин ҳаётимда ҳам, фаолиятимда ҳам ҳеч қандай ўзгариш сезилмаган. Бу ном ўзимга ҳам ёқади ва бунга кўникиб кетганман. Албатта, Алвеш мусулмончиликка хос бўлмаган исм, деб айтишади. Лекин мен намозни канда қилмайман, - дейди футболчи.

алвеш1

Хўш, энди унинг фаолиятига тўхталамиз. Ўзимизнинг Алвеш фаолиятини қай даражада ўтказа оляпти? У футболга кириб келишидан то шу кунгача бўлган давр ҳақида гапириб, олдида турган мақсади ҳақида ҳам тўхталиб ўтди. 

- “Машъал” академиясига норматив орқали болаларни олишарди. Биз ҳам кўрикка боргандик. Ўшанда 55-60 нафар боладан тўрт кишини олиб қолишган, мен ҳам уларнинг орасида эдим. Дастлаб, мураббий Дилшод Андаев бошчилигида шуғулланганмиз. 1994 йилдан 1998 йилгача туғилган болалар битта гуруҳ ҳисобланарди. Биз квартирадан қатнардик. Бир йилча қатнаб юрганимдан кейин мени академияга қабул қилишди. Бир қатор мураббийлар бизни кўздан кечиришди. Кейин Анвар ака Хафизов қўли остида шуғуллана бошладим. Сўнг академиядан биринчи лигага ўтганмиз. У ерда бир йил тўп сурдим. Қишки йиғин пайтида мени ўринбосарлар сафига чақиришди. Аммо ижарага бериб юборишди. Натижада “Хотира-79”да ўйнаб келдим. Ундан кейин фаолиятимни яна “Машъал”да давом эттирдим. Навбатдаги клубим эса “Шўртан” бўлди. Афсуски, ушбу жамоага кетганим мен учун орқага қадам бўлди. У ерда бошида ҳаммаси яхши эди, шартнома имзолагандик. “Шўртан” биринчи лигага тушиб кетмасидан олдин ўша ерда эдим, ўринбосарлар сафида. Биринчи лигага тушиб кетганидан кейин ҳам клубда қолдим. Аммо ўйин амалиёти етарлича бўлмади. Мураббийлар алмашгани туфайли менга деярли имконият беришмаганди. Янги мураббийдан мен учун имконият беришини сўрадим, шу тариқа қандайдир можаро бўлди ва “Шўртан”ни тарк этдим. Шу пайт агент орқали менга Европадан яхши вариант пайдо бўлди. Испания Сегундасининг учинчи дивизионидаги жамоаси билан музокара олиб борилганди. Улар мени чақиришган ва шартномани ҳам жўнатишганди. Бунинг учун барча хужжатларни тайёрлаб қўйгандим. Бахтга қарши пандемия бошлангач, бу иш амалга ошмай қолди. Ҳозир ўзим якка тартибда шуғулланиб турибман. Алоҳида мураббий билан гаплашганман ва махсус индивидуал график асосида ишлаяпман. Яна “Шўртан”га қайтиб ўйнаб тургани кўнглим тортмади. Орада “Бунёдкор”га ҳам бориб кўрдим. Лекин олдимда четдан яна аниқ таклиф бор. Ёзги трансфер ойнаси очилганида кетишим мумкин. Бу сафаргиси Европанинг бошқа чемпионатидан. Футболчи сифатида ўсиш ниятим бор. Ўзимга тўлиқ ишонаман. Чунки футболчи бўлиш учун 10-15 йил умрим кетган. Шу боис бу пайтга келиб футболни ташлаб кетишим тўғри бўлмайди, - дея фикр билдирди, Алвеш.

Матнда хатолик топсангиз, ўша хатони белгилаб, бизга жўнатинг (Ctrl + Enter)