Испания ғалабасини нишонлаш пайтида одамлар ҳалок бўлди

Испания терма жамоасининг 2026 йилги жаҳон чемпионатидаги ғалабасини нишонлаш пайтида икки киши ҳалок бўлди, 80 дан ортиқ одам турли даражада тан жароҳати олди. Бу ҳақда EFE агентлиги хабар берди.

Фақатгина Мадриднинг ўзида 36 киши шифохонага етказилган. Барселона клиникаларига эса яна 29 нафар жабрланувчи олиб борилган. Мадрид полицияси камида 12 кишини қўлга олган: шулардан беш нафари барда содир бўлган жанжал ортидан нафрат асосида содир этилган жиноятларда айбланмоқда, яна бир нечта фуқаро эса оммавий тартиббузарликлар учун ушланган.

Фожеали ҳолатлар Испаниянинг турли ҳудудларида қайд этилган. Сьюдад-Родриго (Саламанка провинцияси) шаҳрида байрам пайтида шаҳар фаввораси конструкцияси қулаб тушган. Натижада 13 ёшли ўсмир ҳалок бўлган, яна бир ўсмир оёғи синиб, шифохонага ётқизилган. Толедода эса 20 ёшли йигит ўйинни томоша қилаётган вақтда тўсатдан тутқаноқ касали тутиб, ҳодиса жойида вафот этган.

Сесеньеда 19 ёшли йигит совуқ қурол билан қилинган ҳужумдан сўнг оғир аҳволда шифохонага ётқизилган. Памплонада эса капюшон кийган, қўлида таёқ ва калтак бўлган бир гуруҳ шахс барда ўйинни томоша қилаётган ҳарбийларга ҳужум қилган. Ҳодиса натижасида олти киши жароҳат олган, улардан уч нафари ҳарбий хизматчилар экани маълум қилинган.

Эслатиб ўтамиз, Испания терма жамоаси 2026 йилги жаҳон чемпионати финалида қўшимча дақиқаларда Аргентина устидан 1:0 ҳисобида ғалаба қозониб, ўз тарихидаги иккинчи жаҳон чемпиони унвонини қўлга киритди.