Испания — Ўзбекистон ўйинида учта гол урилди

Ўзбекистон U-17 ёшлар терма жамоаси навбатдаги ўртоқлик учрашувида Испания ёшларига 0:3 ҳисобида мағлуб бўлди.

Беллашув Испаниянинг Альбир шаҳрида бўлиб ўтди. Биринчи бўлимда дарвозалар дахлсиз сақланди ва жамоалар дам олишга 0:0 ҳисобида йўл олишди. Иккинчи таймда эса майдон эгалари устунликка эришди ва учта гол урди.

65-дақиқага келиб Гильермо Трухильяно пенальтини аниқ амалга ошириб, Испанияни ҳисобда олдинга олиб чиқди. Учрашувнинг асосий вақтига қўшиб берилган дақиқаларда Роберто Томас 90+1-дақиқаёқ ҳисобни оширди. Ортидан яна уч дақиқа ўтиб, Михал Жук учинчи гол муаллифига айланди ва натижа якуний кўринишни олди — 3:0.

Ўзбекистон U-17 терма жамоаси учун бу Испаниядаги йиғин доирасидаги иккинчи ўйин бўлди. 

Бундан аввал Сергей Чигодаев шогирдлари Уругвай U-17 жамоасига ҳам 0:3 ҳисобида имкониятни бой берган эди. 

Мазкур ўртоқлик учрашувлари 17 ёшгача бўлган футболчилар ўртасидаги жаҳон чемпионатига тайёргарлик доирасида ўтказилмоқда. Мусобақа 19 ноябрдан 13 декабрга қадар Қатарда бўлиб ўтади.