Жалолиддин Машарипов: "Бизнинг даражамиз бу терма жамоалардан юқори"

Ўзбекистон миллий терма жамоаси Наманган шаҳрида машғулотларни давом эттирмоқда. Бугун ЎФА матбуот хизмати жамоамиз ярим ҳимоячиси Жалолиддин Машарипов билан кичик интервью уюштирди.

– Финалга чиққанимиздан хурсандмиз. Худо хоҳласа, чиройли ўйин кўрсатиб, мухлисларни мамнун қиламиз. Бу беллашувларни расмий баҳсларга тайёргарлик деб биламиз. Йигитлар ўйиндан ўйинга бир-бирини янада яхшироқ тушуниб, мураббий хоҳлаётган нарсаларни кўрсатишга ҳаракат қилмоқда.  

Африка жамоаларининг ҳаммаси бир хил услубда ҳаракат қилади. Улар ҳимояда яхши ўйнайди, ҳужумида доим 1-2 та яхши савиядаги футболчи бўлади. Эртага ўз ўйинимизни кўрсатишга, тўпни кўпроқ назорат қилишга ҳаракат қиламиз. Сабаби, биз ўз майдонимизда ўйнаяпмиз. Шунинг учун ҳам ҳар томонлама устун бўлишимиз керак. Менимча, даражамиз бу терма жамоалардан юқори.