Жалоловнинг издоши. Ўзбек ўғлони профессионал фаолиятини нокаут билан бошлади!

Баҳодир Жалолов ўта оғир вазнда ҳаваскорлар боксида ҳам, профессионал рингда ҳам энг зўр чарм қўлқоп усталаридан эканини исботлаб келмоқда.

Унинг ортидан спорт оламида юқори натижаларни қайд этишга қодир ёш боксчилар ҳам етишиб чиқаётганини кўришимиз мумкин. Улардан Лазизбек Муллажонов ва Жаҳонгир Зокировнинг натижалари кўзга кўриниб қолди.

20 ёшли жиззахлик Жаҳонгир Зокиров профессионал фаолиятини ҳам бошлади. Истеъдодли боксчимиз илк учрашувини АҚШнинг  Техас штати Розенберг шаҳрида ташкил этилган профессионал бокс кечасида ўтказди.

Зокировга АҚШ шарафини ҳимоя қилаётган асли мексикалик бўлган Гильермо Даниэль Дель Рио Эрнандес рақиблик қилди. Гильермо профессионал фаолиятини 2014 йилда бошлаган ва шу пайтга қадар тўққиз марта рингга кўтарилган эди.

Тажрибали рақибга қарши кескин ва муросасиз жанг ўтказган ўзбек ўғлони тўртинчи раундда рақибини техник нокаутга учратди.

Шу тариқа, яна бир боксчимиз ўта оғир вазн тоифасида профессионал рингдаги юришини бошлади ва ғалабалари сонини очди.

Жаҳонгир Зокиров ҳаваскор боксчилар ўртасидаги мусобақаларда катта тажриба тўплаганини таъкидлаш лозим.

Боксга ихтисослашган https://boxrec.com сайти экспертлари ҳамюртимиз ҳаваскорлар ўртасидаги фаолиятини 2020 йилдан бошлаб қайд этган ва 18 та учрашувдаги натижалари рекордини келтириб ўтган.

Унга кўра, Жаҳонгир ана шу жанглардан 15 тасида рақибларини мағлубиятга учратган. Етти марта жангларни муддатидан олдин якунлаган.

Зокировнинг учта мағлубияти фақат бир бокси билан бўлган тўқнашувларда қайд этилган. Жаҳонгирдан анча тажрибали бўлган Лазизбек Муллажонов уни икки марта Ўзбекистон чемпионатида ва бир маротаба Руминияда ташкил этилган нуфузли халқаро турнир финалида мағлуб этган.

Жаҳонгир ҳаваскорлар ўртасида халқаро миқёсдаги мусобақаларда нуфузли совринларни қўлга киритган. 2021 йилнинг апрелида Польшада ўтказилган ёшлар ўртасидаги жаҳон чемпионати давомида ҳамюртимиз колумбиялик Марлон Уртадо, туркиялик Аҳмад Шенол, венгриялик Левента Киссни енгиб, финалга чиққан.

Ҳал қилувчи финал учрашувида Зокиров арманистонлик Ованес Папазянни техник нокаутга учратиб, ёшлар ўртасида жаҳон чемпионлигига сазовор бўлди.

Шунингдек, Жаҳонгир 2023 йилнинг бошида Таиландда ўтказилган 22 ёшгача бўлган боксчилар ўртасидаги Осиё чемпионати финалида хитойлик Айзихайер Туохонгдажини очколар ҳисобида енгиб, шоҳсупанинг энг юқори поғонасидан жой олди.