Жамшид Саидов: "Биринчи даврадан сўнг кучайишимиз аниқ"

Ўзбекистон Суперлигасининг 12-туридан ўрин олган “Навбаҳор” – “Қизилқум” (0:0) учрашувидан кейинги матбуот анжуманининг биринчи қисмида меҳмонлар бош мураббийи Жамшид Саидов қатнашиб, журналистларнинг саволларига жавоб берди.

Қуйида унинг фикрларини эътиборингизга ҳавола этамиз.

- Ўйин ҳақида ҳеч нарса демоқчи эмасман. Учрашув жуда яхши ўтди. Қарши ҳужум орқали имкониятлар яратишга уриндик. Чунки “Навбаҳор” қандай ўйнашни билади. Қолаверса, Наманганда ўйнадик. Бугун омад биз томонда бўлди. Йигитларга, шунингдек, узоқ йўлдан бизни қўллаб-қувватлашга келган мухлисларга миннатдорчилик билдираман. Бугун етакчидан очко тортиб олганимиздан хурсандман.

Акаки ҳақида ҳозир ҳеч нарса дея олмайман, лекин у биринчи бўлимда жароҳат олди. Бир неча кундан сўнг унинг саломатлиги ҳақида билиб оламиз. Унинг жароҳати сабабли, тактикамиз ўзгарди. Чунки у жамоа етакчиларидан бири ҳисобланади Умид қиламанки, Акакининг жароҳати жиддий бўлиб чиқмайди. Чунки олдимизда биринчи даврадаги ОКМКга қарши сўнгги ўйин кутиб турибди. Мухлисларимиз қаршисида бор имкониятимизни ишга солишимиз керак. Бошқа баҳсларга қандай тайёргарлик кўрсак, бунга ҳам шундай тайёргарлик кўрамиз.

Шогирдларимнинг бугунги намойиш этган ўйинларидан мамнунман. Режалар ҳақида гапирадиган бўлсак, селекция ишлари олиб борилмоқда, жамоага янги қон керак. Мавсумни яхши бошлагандик, лекин биринчи давра сўнгида омад биздан юз ўгирди. Ўйлашимча, жамоа ёмон эмас. Аммо биринчи даврадан сўнг кучайишимиз аниқ. 

“Навбаҳор” чемпионлик учун курашадиган етакчи клублардан бири. Улар билан очиқ футбол ўйнаб бўлмайди. Бугун биз ҳимояландик, аммо “Навбаҳор” таркибида терма жамоанинг ярим футболчилари жамланишган. Уларнинг аксарияти турли клубларда бир неча бор мамлакат чемпионлигини қўлга киритишган. Рақиб ўз майдонида ўйинни ҳамиша кучли тарзда бошлашини билардик. Улар дастлабки дақиқалардан прессингга урғу беришди. Мухлисларнинг мезбонларни қўллаб-қувватлашлари ҳам катта аҳамиятга эга. Биз  буни билардик ва шунга яраша тайёрландик. Чемпионатда ҳамма бир-бирини билади. Муҳими, қийин ўйинда очко қўлга киритдик. 

Бугун бизга совуққонлик ҳамда маҳорат етишмади. Қолаверса, ҳаво иссиқ бўлди, бу ҳам футболчиларга таъсир ўтказди, - деди Жамшид Саидов.

“Навбаҳор” ПФК матбуот хизмати.