Жавоҳир Синдоров жамоаси билан миллион долларлик мусобақада ғалаба қозонди!

Жорий йилнинг 3-12 октябр кунлари Лондон шаҳрида шахматнинг рапид йўналиши бўйича FIDE таснифига кирувчи Global Chess League халқаро турнири бўлиб ўтди. 

Мукофот жамғармаси 1 миллион АҚШ долларини ташкил қиладиган ушбу мусобақада дунёнинг энг кучли шахматчиларини ўзида жамлаган 6 та жамоа иштирок этди. Эътиборлиси, бу жамоаларнинг иккитасида ҳамюртларимиз қатнашди. Жумладан, "PBG Alaskan Knights"  жамоасида Нодирбек Абдусатторов, "Triveni Continental Kings" жамоасида эса Жавоҳир Синдоров дона сурди. 

Ҳал қилувчи финал баҳсида ҳамюртларимизнинг жамоалари ўзаро тўқнашди. Якунда ғолиблик ва 500 минг АҚШ доллари Жавоҳир Синдоровнинг "Triveni Continental Kings" жамоасига насиб этди. Нодирбек Абдусатторовнинг жамоаси иккинчи ўринни эгаллади. 

Қайд этиш лозимки, "Triveni Continental Kings" жамоаси ўтган 2023-йилда ҳам Global Chess League турнирида ғолибликни қўлга киритган эди.